Ndërsa zëvendëspresidenti amerikan JD Vance u nis drejt Pakistanit për bisedime paqeje me Iranin, një zyrtar i lartë iranian ka paraqitur kushte të reja për fillimin e negociatave, duke shtuar pasigurinë për qëndrueshmërinë e armëpushimit dhe për mundësinë e një marrëveshjeje afatgjatë.
Mohammad Bagher Ghalibaf, kryetari i Parlamentit iranian, deklaroi në një postim në rrjetin X se dy kërkesa duhet të përmbushen para se të nisin bisedimet: një armëpushim në Liban dhe zhbllokimi i aseteve iraniane të ngrira jashtë vendit.
Ai nuk sqaroi se cilave fonde iu referohej, por shumë prej aseteve iraniane në bankat e huaja janë ngrirë për shkak të sanksioneve të vendosura nga Shtetet e Bashkuara dhe vendet perëndimore.
Ndërkohë, Izraeli vazhdoi të premten operacionet kundër Hezbollahut në Libanin jugor, duke intensifikuar sulmet ajrore ndaj grupit militant të mbështetur nga Irani.
Sulmet vazhduan pavarësisht thirrjeve të presidentit amerikan Donald Trump drejtuar kryeministrit izraelit Benjamin Netanyahu për të ulur intensitetin e operacioneve në Liban.
Këto zhvillime kanë nxjerrë në pah dallime të dukshme mes dy liderëve. Netanyahu ka deklaruar se objektivat e Izraelit ende nuk janë arritur, ndërsa Trump duket i interesuar për një marrëveshje me Iranin që do t’i jepte fund luftës.
Nën presionin e Trump dhe të disa liderëve evropianë, Netanyahu tha të enjten se Izraeli do të nisë bisedime me qeverinë libaneze për çarmatimin e Hezbollahut. Por vetëm disa orë më vonë ai premtoi se sulmet ndaj grupit do të vazhdojnë, duke deklaruar se “nuk ka armëpushim në Liban”.
Nga ana tjetër, një zyrtar i lartë i Hezbollahut hodhi poshtë idenë e negociatave mes Izraelit dhe Libanit, duke theksuar se qeveria libaneze nuk përfaqëson këtë organizatë.
