Kryeministri izraelit Benjamin Netanyahu ka akuzuar Spanjën për “armiqësi” ndaj Izraelit, pasi Madridi u përjashtua nga Qendra e Koordinimit Civilo-Ushtarak që lidhet me armëpushimin në Gaza.
Në një mesazh video të publikuar sot, Netanyahu deklaroi se vendimi erdhi pasi Spanja, sipas tij, ka mbajtur vazhdimisht një qëndrim kundër Izraelit.
“Izraeli nuk do të qëndrojë në heshtje përballë atyre që na sulmojnë,” tha Netanyahu.
Ai akuzoi gjithashtu Spanjën se ka “shpifur ndaj heronjve tanë”, duke iu referuar ushtarëve të Forcave të Mbrojtjes së Izraelit (IDF), të cilët ai i përshkroi si pjesë e “ushtrisë më morale në botë”.
“Për këtë arsye kam urdhëruar largimin e përfaqësuesve spanjollë nga qendra e koordinimit në Kiryat Gat, pasi Spanja ka zgjedhur vazhdimisht të qëndrojë kundër Izraelit,” tha ai.
Netanyahu shtoi se vendet që, sipas tij, sulmojnë Izraelin në vend që të përballen me “regjimet terroriste”, nuk do të jenë partnerë në të ardhmen e rajonit.
“Nuk jam i gatshëm të toleroj këtë hipokrizi dhe këtë armiqësi. Nuk do të lejoj që asnjë vend të zhvillojë një luftë diplomatike kundër nesh pa paguar një çmim të menjëhershëm,” përfundoi ai.
