Në një ndërhyrje të pazakontë nga Shtëpia e Bardhë, Melania Trump ka hedhur poshtë me tone të ashpra çdo përfshirje të saj me krimet e financierit amerikan Jeffrey Epstein, duke denoncuar shpifjet dhe insinuatat ndaj saj.
Në një paraqitje të rrallë dhe të papritur publike, zonja e parë deklaroi se “gënjeshtrat dhe insinuatat” që e lidhin me Epstein “duhet të marrin fund”, duke mohuar çdo përfshirje apo njohje me krimet e ish-financierit dhe duke paralajmëruar edhe veprime ligjore.
Bashkëshortja e presidentit theksoi se nuk ka pasur kurrë marrëdhënie me Epstein apo me ish-partneren dhe bashkëpunëtoren e tij, Ghislaine Maxwell. Ajo gjithashtu mohoi pretendimet se ishte pikërisht Epstein ai që e kishte prezantuar me Donald Trump.
Në fund të deklaratës së saj, Melania Trump i bëri thirrje Kongresit amerikan që të zhvillojë një seancë publike ku të dëgjohen viktimat e financierit.
“Gënjeshtrat që më lidhin me të neveritshmin Jeffrey Epstein duhet të marrin fund që sot. Individët që gënjejnë për mua nuk kanë as standarde etike, as përulësi dhe as respekt. Nuk kundërshtoj injorancën e tyre, por refuzoj përpjekjet e tyre të ulëta për të njollosur reputacionin tim”, deklaroi zonja e parë.
