Shefi i Shtabit të Forcave të Mbrojtjes së Izraelit (IDF), Eyal Zamir, deklaroi se ushtria izraelite do të vijojë operacionet e saj ushtarake në Libanin jugor, duke theksuar se vendi nuk ndodhet në armëpushim me Hezbollah, por “në gjendje lufte”.
Gjatë një vizite pranë zonës së Bint Jbeil, Zamir u shpreh: “IDF është në gjendje lufte. Ne nuk jemi në armëpushim dhe vazhdojmë të luftojmë në këtë zonë, e cila përbën zonën tonë kryesore të luftimeve”. Ai shtoi gjithashtu se me Iranin, Izraeli ndodhet aktualisht në armëpushim, por situata mund të ndryshojë në çdo moment.
Ndërkohë, zëdhënësi i ushtrisë izraelite, Avichay Adraee, njoftoi se IDF do të nisë shënjestrimin e ambulancave në Liban, pas akuzave se Hezbollahu po i përdor strukturat mjekësore për qëllime ushtarake.
“Ne do të veprojmë në përputhje me të drejtën ndërkombëtare kundër çdo aktiviteti ushtarak të kryer nga Hezbollahu, përfshirë përdorimin e ambulancave dhe objekteve mjekësore,” deklaroi Adraee.
