Pas kërkesës së Donald Trump që Irani të rihapë Ngushticën e Hormuzit, ambasada iraniane në Zimbabve iu përgjigj me një koment ironik në rrjetin X: “Kemi humbur çelësat.”
Që nga sulmet e Shteteve të Bashkuara dhe Izraelit ndaj Iranit në shkurt, llogaritë zyrtare të disa ambasadave dhe konsullatave iraniane në botë janë bërë virale me postime që shpesh rivalizojnë, madje edhe tejkalojnë, stilin provokues të Trump në rrjetet sociale.
Ambasadat iraniane në Afrikë duket se kanë marrë rolin kryesor në këtë ofensivë digjitale, veçanërisht ajo në Afrikën e Jugut. Në një postim në X, në ditën kur hyri në fuqi armëpushimi mes SHBA-së, Izraelit dhe Iranit, ambasada iraniane në Pretoria shkroi: “Thuajini përshëndetje superfuqisë së re botërore.” Mesazhi ishte një thumbim ndaj Uashingtonit, duke nënkuptuar se pavarësisht epërsisë ushtarake, SHBA nuk arriti të rrëzojë regjimin teokratik iranian.
Një tjetër postim i së njëjtës ambasadë luante me pretendimet e Trump se është paqebërës, duke vendosur një pëllumb paqeje në formë vizatimi përballë hijes së një avioni luftarak.
Ndërsa disa misione diplomatike iraniane kanë shpërndarë postime që tallin Trump, llogaria e ambasadës në Afrikën e Jugut bie në sy për frekuencën e postimeve, përhapjen virale dhe për marrëdhëniet e ngrohta mes Pretorias dhe Teheranit.
Sipas Na’eem Jeenah, drejtor ekzekutiv i Afro-Middle East Center në Johanesburg, Irani duket se po zgjedh me kujdes vendet ku përdor këtë strategji komunikimi agresive. “Ata veprojnë në vende ku kjo nuk do të sjellë pasoja negative nga qeveria pritëse dhe ku mund të gjejnë mbështetje nga publiku. Afrika e Jugut është ndoshta një nga shembujt më të mirë,” tha ai.
Administrata Trump ka akuzuar shpesh Afrikën e Jugut se është tepër e afërt me Iranin. Nga ana tjetër, qeveria në Pretoria është përgjigjur duke theksuar lidhjet historike mes dy vendeve dhe rëndësinë e mosrreshtimit në politikën e saj të jashtme.
Jo të gjitha postimet kanë qenë ironike. Ambasada iraniane në Afrikën e Jugut përdori edhe inteligjencë artificiale për të “ringjallur” në video disa fëmijë që thuhet se u vranë nga një bombë amerikane që goditi shkollën e tyre në qytetin jugor iranian Minab në fillim të luftës. Në këto video, fëmijët flasin për ëndrrat e tyre për të ardhmen.
Analistët thonë se Irani po përdor gjuhën dhe stilin e kulturës së rrjeteve sociale për një formë të re lufte informative. Qëllimi, sipas tyre, është të zbusë imazhin e vendit dhe të ndikojë tek një brez i ri përdoruesish që janë më të ndjeshëm ndaj narrativave online sesa ndaj historisë së represionit të brendshëm dhe tensioneve të gjata gjeopolitike me Perëndimin.
Ndërkohë, ambasada të tjera iraniane në Afrikë kanë përdorur llogaritë e tyre për të lavdëruar vendet pritëse dhe për të krijuar përshtypjen se ato mbështesin Iranin në përballjen me SHBA-në dhe Izraelin. Në një postim, ambasada iraniane në Tunizi nisi edhe një zinxhir mesazhesh me misione të tjera diplomatike duke pretenduar se kishin mbështetjen e vendeve ku ndodhen.
