Në një tjetër seancë parlamentare ku pritej llogaridhënie e drejtpërdrejtë nga kreu i ekzekutivit, skena politike në Kuvend ofroi sërish të njëjtën panoramë të njohur: mungesën e kryeministrit Edi Rama dhe përdorimin e figurave periferike për të mbuluar hapësirën politike.
Përballë opozitës dhe prioriteteve të ditës, Rama zgjodhi të mos ishte i pranishëm dhe te mos e nderpriste viziten ne SHBA. Përgjegjësia teorikisht i kalonte zëvendëskryeministres Albana Koçiu, por edhe ajo preferoi heshtjen. Në vend të një debati përmbajtësor mbi qeverisjen aktuale, kabineti qeveritar nxori në foltore Erjona Ismailin, ministren për Marrëdhëniet me Parlamentin — një figurë thuajse anonime për opinionin publik.
Fjalimi i përgatitur nga qeveria dhe i lexuar prej saj i ngjante më shumë një skenar patetik nostalgjie negative sesa një qëndrimi zyrtar shtetëror për sfidat e sotme. Në vend që të përgjigjej për çështjet e nxehta të qeverisjes, ministrja u rikthye tre dekada pas në kohë, duke evokuar fantazmat e së shkuarës politike:
“Nuk harrojnë shqiptarët, se nuk ka se si të harrojnë. SHIK, sot një temë që u përmend shumë, është një institucion që prej viteve ’90 ka përfaqësuar rënien e shtetit. S’kanë si ta harrojnë shqiptarët SHIK-un e atëhershëm si pushtet të pakufijshëm në duart e xhelatëve të Berishës, që përndiqte, dhunonte, vriste si polici politike dhe që s’jepte llogari askund. S’mund të harrohet SHIK-u i Gazidedes si drejtues famëkeq i operacionit të ’97-s për shtypjen e revoltave popullore. SHIK, jo më larg se në 2012, Ilir Kumbaro u dënua me 15 vite burg për torturën që shkaktoi vdekjen e Remzi Hoxhës. Na tregoni pak se si ndodhi arratisja nga Shqipëria e ish-kreut të SHIK, që u strehua në Turqi dhe Siri. Si biznesmeni Fazlliç ka marrë pjesë në një mbledhje të Këshillit të Sigurisë Kombëtare me ftesën tënde, Sali. Përdorej SHIK për armiqtë dhe mbështetësit e tu, digjte redaksi gazetash, rrëmbente e dhunonte gazetarë. Shtet pa shtet, si ky që keni qeverisur ju. Shteti që është shtet i ka pushtetet e ndara, ku secili funksionar ka përgjegjësi individuale. Ne luftojmë për pavarësinë e drejtësisë, ju luftoni drejtësinë”, u shpreh Ismaili nga foltorja.
Kjo strategji e riciklimit të viteve '90 për të shmangur llogaridhënien e vitit 2026 tregon një konsumim të thellë politik. Kur përballja me bilancin e sotëm dhe skandalet aktuale bëhet e vështirë, zgjidhja e vetme e maxhorancës mbetet fshehja pas historisë dhe përdorimi i ministrave pa peshë si mburojë retorike në Kuvend.
