Brad Pitt rikthehet në ekranin e madh me një histori mbijetese ku këtë herë nuk ka makina garash, ushtri apo partnerë të famshëm hollivudianë. Në krah të tij është një qen ushtarak me emrin Odin.
Filmi i ri “Heart of the Beast”, me regji të David Ayer, e vendos Pitt në rolin e James Belmont, një oficer të Forcave Speciale që pas një aksidenti të rëndë ajror mbetet i izoluar në një nga zonat më të egra të Alaskës. I vetmi që ndodhet pranë tij është Odin, qeni me të cilin ka kaluar më parë misione të rrezikshme.
Të bllokuar larg çdo forme qytetërimi, të dy duhet të përballen me të ftohtin ekstrem, terrenin e egër, kafshët grabitqare dhe një seri pengesash që e kthejnë udhëtimin drejt shpëtimit në një luftë për mbijetesë.
Por në qendër të filmit nuk është vetëm aksioni. Historia ndërtohet mbi marrëdhënien mes James dhe Odin dhe besimin që ata kanë krijuar gjatë viteve të kaluara së bashku. Në një situatë ku ndihma mund të mos vijë, mbijetesa e secilit varet nga tjetri.
“Heart of the Beast” ribashkon Brad Pitt me regjisorin David Ayer 12 vjet pas filmit të luftës “Fury”. Ndërsa në atë film Pitt ishte brenda një tanku në Luftën e Dytë Botërore, këtë herë kundërshtari kryesor është vetë natyra.
Krahas Pitt, në film interpretojnë J.K. Simmons dhe Anna Lambe, ndërsa skenari është shkruar nga Cameron Alexander. Fotografia mban firmën e Mauro Fiore, fitues i çmimit Oscar për “Avatar”.
Filmi, me një kohëzgjatje prej 101 minutash, u prezantua jashtë konkurrimit në edicionin e 74-t të Festivalit Ndërkombëtar të Filmit në San Sebastián më 22 shtator.
Kritika e The Guardian e përshkruan filmin si një aventurë mbijetese ku lidhja mes Pitt dhe qenit Odin është zemra emocionale e historisë, me elemente që të kujtojnë historitë klasike të njeriut përballë natyrës.
“Heart of the Beast” mbërrin në kinematë amerikane më 25 shtator 2026, vetëm pak ditë pas premierës së tij në San Sebastián.
Për Brad Pitt, filmi vjen pas suksesit të “F1” dhe e vendos sërish në rolin e një burri me shumë përvojë që detyrohet të përballet me kufijtë e tij. Vetëm se këtë herë, në vend të një makine Formula 1, partneri që mund t’i shpëtojë jetën ka katër këmbë dhe quhet Odin.
