"Burgjet në shumë aspekte tejkalojnë kohën staliniste. Nuk ka vdekje natyrale për 28 vjeçarë, janë fshehje në këto institucionet. Vetë Ulusiu merret me akte të ulëta, provokime pa koncept për dinjitetin njerëzor"-kështu shprehet kreu i Partisë Demokratike, Sali Berisha, teksa akuzoj ministrin e Drejtësisë. Sipas Berishës vdekjet nëpër burgje nuk ndodhin për shkaqe natyrale, duke marrë rastin e disa të rinjve që kanë humbur jetën në ambientet e burgimit. Për kryedemokratin institucionet fshehin se ç’ndodh me ta, pasi nuk mund të ketë vdekje natyrale për një 28-vjeçar. Sakaq, Berisha foli edhe për keq-qeverisjen Rama që ka larguar nga vendi më shumë se çdo pushtim i mëparshëm përfshi edhe atë serb sipas tij. Gjatë prezantimit të programit për sigurinë, Berisha akuzoi kreun e qeverisë Edi Rama për lidhje me krimin. "Dosjen me 1 milionë faqe të ardhura, të bisedave telefonike që dëshmojnë lidhjet e tmerrshme të krimit me politikën do zbardhen dhe do bëhen publike në mënyrë që shqiptarët të ndahen nga bota e krimit", deklaroi Berisha gjatë prezantimit të programit për sigurinë të Partisë Demokratike. Kreu i selisë blu tha se nga organet e Policisë së Shtetit do të largohen që të gjithë ata që janë të inkriminuar. Dhe se kjo është një luftë për ekzistencën e Shqipërisë, nuk është një luftë për karrigen e askujt. Kjo është luftë për ekzistencën e këtij kombi. Ndërkohë, ai premtoi se me ardhjen e PD në pushtet, siguria dhe rendi do të jenë prioritet absolut, dhe Shqipëria do të pastrohet nga krimi për të garantuar një shoqëri të sigurt dhe tërheqëse për investitorët e huaj.
