Gjykata e Apelit të Posaçëm, e cila konfirmoi masën e sigurisë “arrest me burg” ndaj kryebashkiakut të Tiranës, Erion Veliaj, argumenton se ai, duke gëzuar funksionin si kryebashkiak, zotëron pushtet dhe lidhje të forta që i mundësojnë ndikimin në marrjen dhe vërtetësinë e provave, si dhe intimidimin e dëshmitarëve. Për më tepër, gjykata thekson se ai ka mundësinë të dëmtojë apo të vërë në rrezik marrjen e provave dhe të ushtrojë presion mbi dëshmitarët.
Sipas gjyqtarit Engert Pellumbi, Veliaj paraqet një rrezikshmëri të theksuar shoqërore, jo vetëm për shkak të dyshimeve se ka kryer dy vepra penale – korrupsion në 9 raste dhe pastrim parash – por edhe për sjelljen kërcënuese dhe intimiduese gjatë qëndrimit në paraburgim ndaj gjykatës dhe prokurorisë. Kjo sjellje, sipas gjyqtarit, nënvizon rrezikshmërinë e lartë që ai paraqet.
Në vendimin e arsyetuar, gjykata thekson se për Veliajn ekzistojnë tre kushte specifike që justifikojnë masën ekstreme të arrestit me burg:
- Rreziku i manipulimit të provave,
- Rreziku i arratisjes, dhe
- Rreziku i përsëritjes së veprave penale të ngjashme me ato për të cilat po procedohet.
Sa i përket rrezikut të manipulimit të provave, gjykata evidenton se Veliaj kishte organizuar një fushatë denigruese dhe intimidimi ndaj organeve proceduese, duke përfshirë edhe nxitjen e personave me dijeni për çështjen të mos jepnin deklarata.
“Nga përgjimet e realizuara në zbatim të vendimeve gjyqësore, të shoqëruara me postime në media të shkruara dhe online, sipas porosive të dhëna nga personi nën hetim, rezulton se është zhvilluar një fushatë e orkestruar sulmi ndaj organeve proceduese. Kjo, në mënyrë logjike, krijon presion ndaj personave të thirrur për të dëshmuar mbi rrethanat e çështjes,” thuhet në vendim.
Erion Veliaj është përgjuar gjatë qëndrimit në paraburgimin e Durrësit, dhe bisedat e regjistruara janë përdorur nga SPAK si prova kundër tij në Gjykatën e Apelit të Posaçëm. Sipas përgjimeve, Veliaj ka organizuar sulme kundër prokurorëve dhe gjyqtarëve të SPAK, duke synuar ushtrimin e presionit për zbutjen e masës së sigurisë.
Gjykata vlerëson se funksioni i tij si kryebashkiak i jep pushtet të konsiderueshëm dhe lidhje të forta me segmente të ndryshme, të cilat mund të përdoren për të ndikuar në hetimin dhe procesin gjyqësor. Për më tepër, ai ka kapacitetin të dëmtojë apo të vërë në rrezik provat dhe të ushtrojë presion mbi dëshmitarët për të ndikuar në rezultatin e çështjes.
Aktualisht, Veliaj po hetohet së bashku me bashkëshorten e tij dhe gjashtë biznesmenë të tjerë për akuza që lidhen me korrupsionin dhe pastrimin e parave.
