Kryeministri Edi Rama zhvilloi një takim me përfaqësues të bizneseve që operojnë përmes Portit të Durrësit, ku theksoi se koncesioni për skanimin në dogana është një nga më të gabuarit e mundshëm.
Ai u shpreh se ky koncesion nuk është anuluar për shkak të kostove të larta që do sillte një proces arbitrazhi. Si zgjidhje, Rama bëri të ditur se do aplikohet një sistem skanimi i bazuar në risk, jo në kontroll total.
Fillimisht, nga 100 kamionë që dalin nga porti, vetëm 10 do të kontrollohen me skaner, me synimin që numri të ulet më tej. Ai nënvizoi se, ndonëse koncesioni ka kosto të lartë për sipërmarrjet, ai ka ndihmuar në uljen e kontrabandës.
Rama: Nuk e kemi pasur ta mundur ta godasim për shkak të paktit që ashtu siç është kopsitur do të na krijonte një kosto shumë të lartë në arbitrazh. Jemi munduar ta vëmë në shfrytëzim dhe të lehtësojmë koston mbi ju. Kemi bërë një negociatë me ju atëherë që e kemi ulur nga 45 euro në 22, por mbetet një koncesion i gabuar totalisht sepse skanimi i kamionëve nuk është nevoja juaj, por nevojë e shtetit për çështje të sigurisë dhe luftës kundër kontrabandës. Këtu jemi para një situatë që do zgjasë deri në 2030, e dini afatin. Ajo që do bëjmë ne është që duke pasur parasysh natyrën e aktiviteteve tuaja, të kontributeve tuaja si taksapaguesve ne do fillojmë të operojmë jo në bazë të kontrollit 100%, por kontrollit në bazë të riskut.
