Kryeministri Edi Rama deklaroi se është krenar për rezultatet e reformës në drejtësi dhe mbështeti fuqishëm punën e SPAK, duke e cilësuar si një nga arritjet më të rëndësishme të qeverisë së tij dhe të Partisë Socialiste. Në një konferencë të përbashkët me shefen për politikë të jashtme të Bashkimit Europian, Kaja Kallas, Rama tha se Shqipëria po kalon një moment historik që po vendos themelet e barazisë para ligjit.
“Jo vetëm që jam i kënaqur me punën e SPAK, por jam krenar. Jam krenar sepse sot, falë reformës në drejtësi që është bërë nga Partia Socialiste dhe me mbështetjen e pakufizuar të BE-së, zyrtarë të lartë po hetohen në mënyrë të pavarur,” tha Rama, duke theksuar se ky është një ndryshim rrënjësor në sistemin e drejtësisë shqiptare.
Ai theksoi se vendi nuk ka njohur më parë raste të hetimeve të pavarura ndaj zyrtarëve me pushtet politik. “Që nga viti 1912, kur kemi shpallur shtetin e pavarur, nuk kemi pasur asnjë rast ku një person i veshur me pushtet politik të jetë hetuar dhe gjykuar në mënyrë të pavarur. Sot jemi duke bërë pikërisht këtë ushtrim dhe duke vendosur themelet e barazisë para ligjit,” deklaroi kryeministri.
Rama e konsideroi integrimin në Bashkimin Europian si element kyç për të garantuar që drejtësia e re dhe barazia para ligjit të mos varen nga vullneti politik, por të jenë norma të pandryshueshme. “Ne na duhet hyrja në BE që barazia para ligjit të jetë e pakthyeshme, që të mos varet nga dëshira e një kryeministri apo një tjetri, por të jetë një standard i panegociueshëm dhe i pashkelshëm nga askush,” u shpreh ai.
Kryeministri theksoi se pavarësisht kritikave dhe “llumit të përditshëm të politikës”, historia do ta kujtojë këtë fazë si një moment të rëndësishëm të shtetformimit modern. “Është një nga ato gurë themeli që mund t’i mbulojë llumi i kënetës së politikës së përditshme, por historia i kujton dhe i mban mend si momente të shtetbërjes,” tha ai.
Në përfundim të deklaratës, Rama garantoi se qeveria do të vazhdojë të mbështesë pa asnjë hezitim procesin e reformës në drejtësi. “Ne do të vazhdojmë ta mbështesim fuqimisht këtë proces të barazisë para ligjit. Aleanca me BE është një garanci absolute për këtë, sepse BE ka dijet dhe instrumentet që e bëjnë të mundur këtë transformim të madh institucional dhe shoqëror për vendin tonë,” përfundoi Rama.
