Shefja e Politikës së Jashtme të Bashkimit Europian, Kaja Kallas, gjatë një konference për mediat me Kryeministrin Edi Rama, deklaroi se Shqipëria është një partner i fortë i BE-së, duke vlerësuar përkushtimin e vendit ndaj politikës së jashtme dhe të sigurisë së unionit.
“Shqipëria është një partner i fortë i BE-së. Ju jeni aleat i NATO-s dhe jeni në përputhje të plotë me politikën e jashtme dhe të sigurisë së BE-së. Vendimi juaj për të zbatuar sanksionet kundër Rusisë dhe mbështetja ndaj Ukrainës tregojnë përkushtimin ndaj vlerave të përbashkëta”, u shpreh Kallas.
Ajo theksoi rëndësinë e bashkëpunimit rajonal dhe angazhimin e BE-së për një mjedis të sigurt në Ballkanin Perëndimor. Në këtë kuadër, ajo njoftoi se do të nisë për herë të parë dialogu Shqipëri–BE për sigurinë dhe mbrojtjen, si dhe bashkëpunimi do të zgjerohet edhe në fusha si siguria kibernetike.
Sipas Kallas, BE ka ofruar 13 milionë euro për të përmirësuar përgatitjen e forcave të armatosura shqiptare, ndërkohë që po punohet në mënyrë të përbashkët me vendet anëtare për prokurimin.
Shefja e diplomacisë europiane theksoi gjithashtu mbështetjen për hapjen e kapitujve të negociatave dhe përcaktoi vitin 2030 si një objektiv të mundshëm për anëtarësimin e Shqipërisë në BE, nëse vendi përmbush reformat e nevojshme.
“2030 është një objektiv i arritshëm nëse bëjmë detyrat e shtëpisë. Reforma në sundimin e ligjit dhe lufta kundër korrupsionit janë kyçe. Nuk mjafton vetëm miratimi, por kërkohet edhe zbatimi i tyre. Qytetarët duhet të shohin rezultate konkrete dhe besim te drejtësia”, theksoi Kallas
