Kryeministri Edi Rama ka deklaruar sot se Shqipëria është në një fazë transformimi të madh dhe po shihet me seriozitet nga Bashkimi Europian. Gjatë rubrikës “Sy m’sy”, ai u ndal te zhvillimet europiane dhe reagimet politike në vend.
“Shqipëria nga një vend që nuk ja hidhte kush sytë, tani shihet si një destinacion turistik që rritet me shpejtësi marramendëse. Jemi në një proces të programuar prej 12 vitesh, çdo hap është i planifikuar. BE ka dhënë një afat, një datë – një gjë që nuk e bën zakonisht, për të dhënë një sinjal të qartë se po zgjerohet dhe unifikohet”, u shpreh Rama.
Duke iu përgjigjur komenteve të qytetarëve, Rama u ndal edhe te kritikat për përdorimin e humorit dhe satirës në komunikim publik.
“Nuk shaj, nuk i ul njerëzit me fyerje si ‘kriminelë’ apo ‘qen bir qeni’. Përdor satirën, dhe kjo i bezdis kundërshtarët. Para disa ditësh postova një teatër kukullash që më dërguan dy të rinj, një formë e lezetshme për të dhënë një mesazh. U sulmua faqja nga një grup kandidatësh të një subjekti të ri politik. Kush nuk përballon dot humorin, nuk duhet të merret me politikë”, theksoi ai.
Rama shtoi me ironi se është kënaqur me interpretimin e personazhit të tij në spektaklin “Portokalli”, duke e quajtur humorin një mënyrë serioze komunikimi.
I pyetur nga një qytetar nëse do të kërkojë një mandat të pestë nëse Shqipëria nuk hyn në BE deri më 2029, Rama u përgjigj me një buzëqeshje, duke nënkuptuar se për momentin fokusi është në përmbushjen e mandatit aktual.
