Kryeministri Edi Rama, në takimin që zhvilloi me përfaqësues të bizneseve të transportit në Portin e Durrësit, foli edhe për koncesionin e skanimit në dogana i cili tha se është “më i gabuari i mundshëm”. Rama tha se qeveria e tij kur erdhi në pushtet u gjet përpara faktit të kryer dhe se kjo situatë do të vazhdojë deri në vitin 2030.
Kryeministri gjithashtu tha se ky koncesion nuk është hequr për shkak se do të krijonte një kosto të lartë në arbitrazh, ndaj u shpreh se me anë të një marrëveshje do të lehtësohet procesi i skanimit.
Ai më tej tha se ajo që do të bëjnë është që nuk do bëhen 100% kontrolle, por kontrollet do bëhen në bazë të riskut.
“Tema për të cilën jemi këtu është skaneri. Ky është një koncesion më i gabuar i mundshëm që mund të imagjinohet. Një koncesion atipik që ne e kemi trashëguar. Nuk e kemi pasur mundësinë ta godasim për shkak të paktit që, ashtu siç është kopsitur, do të na krijonte një kosto shumë të lartë në arbitrazh. Jemi munduar ta vëmë në shfrytëzim dhe të lehtësojmë koston për ju. Këtu jemi para një situate që do të zgjasë deri në 2030, e dini afatin. Ajo që do të bëjmë ne është që, duke pasur parasysh natyrën e aktiviteteve tuaja dhe kontributet tuaja si taksapagues, do të fillojmë të operojmë jo në bazë të kontrollit 100%, por në bazë të kontrollit sipas riskut. Pra, nga 100 dalje nga porti, vetëm në 10 raste do bëhet skanimi” - tha Rama.
Ky koncesionin u dha në vitin 2013 nga qeveria në ikje e Sali Berishës. Pas rrotacionit politik, Edi Rama u angazhua për ta anulluar koncesionin. Për këtë qeveria shqiptare pajtoi kompaninë e bashkëshortes së Tony Blair si konsulente. Pasi mori qindra mijë euro pagesa nga buxheti i shtetit, kompania britanike e këshilloi qeverinë shqiptare të mos e anullonte koncesionin.
Më pas ajo që ndodhi ishte një rinegocim i tij dhe qeveria e Edi Ramës ndryshoi skemën e financimit të koncesionit, duke ja hequr pagesat biznesit dhe duke i marrë ato përsipër nga buxheti i shtetit. Rinegocimi uli tarifat, por zgjeroi bazën duke futur në pagesë çdo deklaratë doganore.
Atë kohë opozita akuzoi qeverinë se përmes rinegocimit i dha më shumë para kompanisë, kurse qeveria pretendon të kundërtën. Koncensioni i Skanimit po prodhon rreth 4 milionë euro fitime në vit për ata që qëndrojnë pas tij, para të cilat qytetarëve shqiptarë u merren me forcën e ligjit.
