Koalicioni Euroatlantik ka kallëzuar zyrtarisht në SPAK kandidatin për deputet të Sali Berishës në qarkun e Durrësit, ish-prokurorin Arjan Ndoja. Në padinë e depozituar, kërkohet nisja e hetimeve për veprat penale të “korrupsionit aktiv në zgjedhje” dhe “kanosjes apo dhunimit ndaj pjesëmarrësve në zgjedhje”.
Sipas kallëzimit, Ndoja dyshohet se ka ushtruar presion të drejtpërdrejtë ndaj qytetarëve, duke u kërkuar të mos votojnë subjekte të tjera politike. Më tej, ai akuzohet se ka pohuar publikisht lidhje me persona të botës së krimit, me qëllim intimidimin e votuesve dhe ndikimin e procesit zgjedhor.
“Zgjedhjet e 11 majit duhet të jenë të lira, të ndershme dhe pa ndikimin e grupeve kriminale apo formave të blerjes së votës,” – thuhet në dokumentin zyrtar të dorëzuar në Prokurorinë e Posaçme.
Koalicioni i Bashës i bën thirrje SPAK të regjistrojë menjëherë kallëzimin penal dhe të nisë një hetim të plotë, në përputhje me Strategjinë e Hetimit për Krimin Zgjedhor, e cila parashikon veprim aktiv kundër çdo forme presioni apo përfshirjeje të elementëve kriminalë në zgjedhje.
Arjan Ndoja, ish-prokuror, iu bashkua primareve të zhvilluara nga Sali Berisha dhe u përfshi në listat e kandidatëve për deputet në qarkun e Durrësit për zgjedhjet e 11 majit. Emri i tij është përfolur edhe më herët në opinionin publik, sidomos pas atentatit ndaj tij në nëntor të vitit 2019, pranë rrethrrotullimit të Shkozetit.
