Shtetet e Bashkuara kanë ndërmarrë një valë të re sulmesh ajrore ndaj objektivave iraniane, duke e çuar në tre ditë radhazi ofensivën ushtarake me synimin për të garantuar lirinë e lundrimit në Ngushticën e Hormuzit.
Komanda Qendrore e SHBA-së (CENTCOM) deklaroi se sulmet synojnë të dobësojnë aftësinë e forcave iraniane për të sulmuar anijet tregtare dhe civilët në këtë rrugë strategjike detare.
Aksioni erdhi vetëm pak orë pasi presidenti Donald Trump njoftoi rikthimin e bllokadës në Ngushticën e Hormuzit dhe deklaroi se SHBA do të marrë rolin e “Rojës së Ngushticës së Hormuzit”. Ai paralajmëroi gjithashtu se Uashingtoni do të kërkojë kompensim prej 20% për çdo ngarkesë që kalon në këtë korridor detar, për të mbuluar kostot e sigurisë.
Mediat shtetërore iraniane raportuan shpërthime në ishujt Kish, Keshm dhe Abu Musa, ndërsa Garda Revolucionare Islamike (IRGC) deklaroi se lundrimi normal mund të rikthehet vetëm nëse SHBA ndalon ndërhyrjen ushtarake në rajon. Teherani paralajmëroi gjithashtu se çdo shtet që bashkëpunon me Uashingtonin do të mbajë përgjegjësi për përshkallëzimin e konfliktit.
Ndërkohë, Ministria e Mbrojtjes e Emirateve të Bashkuara Arabe njoftoi se dy cisterna të vendit u goditën nga raketa iraniane në ujërat territoriale të Omanit. Si pasojë humbi jetën një marinar indian dhe tetë persona të tjerë mbetën të plagosur.
Pavarësisht përshkallëzimit ushtarak, Trump tha se ende beson se është e mundur arritja e një marrëveshjeje me Iranin, duke pretenduar se palët ishin pranë një dakordësie përpara incidenteve të fundit në Ngushticën e Hormuzit.
Në të njëjtën kohë, Omani vazhdon përpjekjet ndërmjetësuese me Iranin për garantimin e lundrimit të sigurt në Ngushticën e Hormuzit, ndërsa burime diplomatike bëjnë të ditur se Teheranit i janë paraqitur propozime për zgjidhjen e mosmarrëveshjeve, pa pjesëmarrjen e Shteteve të Bashkuara.
