Sipas një investigimi të The New York Times, shërbimi sekret izraelit Mossad zhvilloi për disa vite një operacion sekret për të rekrutuar ish-presidentin iranian Mahmoud Ahmadinexhad, me synimin që ai të bëhej figura e re në krye të Iranit në rast të rrëzimit të regjimit.
Artikulli zbulon se në vitin 2024 Ahmadinexhad u ftua në një konferencë në Universitetin Ludovika të Budapestit, e cila, sipas burimeve amerikane dhe iraniane, shërbeu si mbulesë për takime sekrete me agjentë izraelitë. Thuhet se drejtori i atëhershëm i Mossadit, David Barnea, udhëtoi personalisht në Budapest për ta takuar dhe më pas Mossadi informoi CIA-n se kishte vendosur kontakt me ish-presidentin iranian.
Sipas hetimit, Izraeli financoi fshehurazi udhëtimet dhe qëndrimet e Ahmadinexhadit, ndërsa ai u takua disa herë me përfaqësues të inteligjencës izraelite jashtë Iranit. Kulmi i operacionit erdhi më 28 shkurt të këtij viti, kur, pas një sulmi ajror izraelit pranë banesës së tij në Teheran, agjentë të Mossadit dyshohet se e nxorën nga zona me një makinë dhe e dërguan në një strehë të fshehtë brenda Iranit, si pjesë e planit për ndryshim regjimi.
Megjithatë, Ahmadinexhadi u tërhoq në momentin e fundit. Sipas burimeve të cituara nga NYT, ai humbi besimin te plani izraelit dhe refuzoi të largohej nga Irani për të marrë drejtimin e një qeverie të re.
Artikulli përshkruan edhe transformimin e tij politik pas largimit nga presidenca. Nga një figurë ultraradikale që mohonte Holokaustin dhe bënte thirrje për shkatërrimin e Izraelit, ai nisi të zbusë retorikën, kritikoi regjimin iranian, ndryshoi imazhin publik dhe, sipas njerëzve pranë tij, besonte se mund të rikthehej në pushtet me mbështetjen e fuqive të huaja.
Sipas burimeve iraniane, pas zbulimit të kontakteve me Izraelin, Ahmadinexhadi ndodhet sërish në arrest shtëpiak nën kontrollin e Gardës Revolucionare. Ai u shfaq për herë të parë në publik vetëm pak ditë më parë, gjatë funeralit të liderit suprem Ali Khamenei, i rrethuar nga forcat e sigurisë.
As Mossadi dhe as zëdhënësi i Ahmadinexhadit nuk kanë komentuar publikisht pretendimet e publikuara nga The New York Times. Artikulli mbështetet në burime anonime amerikane, iraniane dhe ish-zyrtarë të inteligjencës, ndaj këto pretendime nuk janë konfirmuar zyrtarisht nga palët e përfshira.
