Çmimet e naftës së papërpunuar Brent u rritën me rreth 5 për qind gjatë së hënës, ndërsa përshkallëzimi i konfliktit mes Shteteve të Bashkuara dhe Iranit shtoi shqetësimet për sigurinë e transportit të naftës në Ngushticën e Hormuzit.
Sipas të dhënave të tregut, standardi ndërkombëtar Brent u ngjit pranë nivelit të 80 dollarëve për fuçi, pasi gjatë fundjavës të dyja palët shkëmbyen sulme të reja me raketa dhe dronë.
Shtetet e Bashkuara njoftuan se ndërmorën raundin e katërt të sulmeve ndaj objektivave iraniane brenda një jave, duke e cilësuar operacionin si kundërpërgjigje ndaj një sulmi iranian ndaj një anijeje kontejnerësh me flamur të Qipros.
Komanda Qendrore e Ushtrisë Amerikane deklaroi se goditi dhjetëra objektiva me synimin për të dobësuar aftësinë e Iranit për të kërcënuar anijet tregtare që kalojnë nëpër një nga korridoret detare më strategjike në botë.
Nga ana tjetër, Irani deklaroi se Ngushtica e Hormuzit do të mbetet e mbyllur "deri në një njoftim të mëtejshëm", megjithëse ky pretendim u hodh poshtë nga CENTCOM.
Korpusi i Gardës Revolucionare Islamike njoftoi gjithashtu se ka goditur dy baza ushtarake amerikane në Kuvajt, duke pretenduar se janë dëmtuar tanke karburanti, sisteme të mbrojtjes ajrore Patriot dhe pajisje radarike.
Teherani bëri të ditur se ka ndërmarrë sulme edhe ndaj objekteve ushtarake amerikane në vende të tjera të Gjirit, ndërsa në të njëjtën kohë u raportuan shpërthime në qytetin portual iranian të Bandar Abbasit, pak para se SHBA-ja të shpallte përfundimin e operacioneve të saj.
Më vonë, ushtria iraniane pretendoi se kishte rrëzuar një dron amerikan mbi Bandar Abbas.
Përshkallëzimi i fundit ka rikthyer pasigurinë në tregjet ndërkombëtare të energjisë. Çmimet e naftës ishin stabilizuar javën e kaluar pas marrëveshjes së përkohshme mes SHBA-së dhe Iranit, e cila kishte rritur pritshmëritë për një tranzit më të sigurt në Ngushticën e Hormuzit dhe për një furnizim më të qëndrueshëm me energji.
Megjithatë, tensionet e reja kanë zbehur shpresat për rifillimin e negociatave, ndërsa Teherani kërkon që Uashingtoni të respektojë angazhimet e mëparshme lidhur me lirinë e lundrimit në Ngushticën e Hormuzit dhe eksportet iraniane të naftës.
