Senatori republikan amerikan Lindsey Graham ndërroi jetë papritur në moshën 71-vjeçare, vetëm pak orë pasi ishte kthyer nga një vizitë zyrtare në Ukrainë. Lajmi u konfirmua nga zyra e tij, e cila njoftoi se senatori humbi jetën pas një "sëmundjeje të shkurtër dhe të papritur".
Megjithatë, rrethanat e vdekjes së tij po hetohen nga autoritetet amerikane. Sipas mediave në SHBA, FBI është përfshirë në hetim për të mbështetur autoritetet lokale në zbardhjen e plotë të rastit. Drejtori i FBI-së, Kash Patel, bëri të ditur se Byroja Federale e Hetimit ka vënë në dispozicion "të gjitha burimet e nevojshme", duke theksuar se deri më tani nuk ka prova që sugjerojnë se bëhet fjalë për një akt kriminal.
Raportimet paraprake bëjnë të ditur se ekipet e emergjencës u thirrën në banesën e Graham në Uashington pas një telefonate që sinjalizonte dhimbje në gjoks. Pas mbërritjes, mjekët e gjetën senatorin në arrest kardiak dhe nisën menjëherë përpjekjet për reanimim, por ai nuk arriti të mbijetonte. Shkaku zyrtar i vdekjes pritet të përcaktohet pas përfundimit të ekzaminimeve mjeko-ligjore.
Përfshirja e FBI-së ka nxitur reagime dhe spekulime në rrjetet sociale, megjithatë autoritetet kanë theksuar se deri në këtë fazë të hetimeve nuk ekziston asnjë element që të lidhë vdekjen e senatorit me veprimtari kriminale. Hetimet vijojnë për të sqaruar plotësisht rrethanat e ngjarjes.
Lindsey Graham ishte një nga figurat më të njohura të Partisë Republikane dhe një aleat i ngushtë i presidentit Donald Trump. Ai njihej për qëndrimet e tij të forta në politikën e jashtme, mbështetjen e vazhdueshme për Ukrainën dhe Izraelin, si edhe për thirrjet për sanksione më të ashpra ndaj Rusisë dhe Iranit. Vetëm një ditë para vdekjes, Graham ishte takuar në Kiev me presidentin ukrainas, Volodymyr Zelensky.
