Omani ka paraqitur një propozim për menaxhimin e trafikut detar në Ngushticën e Hormuzit, një nga rrugët më të rëndësishme të transportit të energjisë në botë, sipas një burimi të afërt me bisedimet.
Sipas burimit të cituar nga CNN, marrëveshja ende nuk është përfundimtare, por parashikon krijimin e dy korridoreve të veçanta lundrimi, të cilat do të mbeten të hapura për trafikun detar.
Korridori jugor, që kalon përmes ujërave territoriale të Omanit, do të lejojë lundrim të lirë sipas rregullave që ishin në fuqi përpara konfliktit të fundit.
Ndërkohë, korridori verior, i cili kalon nëpër ujërat territoriale të Iranit, do të kërkojë miratim paraprak nga autoritetet iraniane për anijet që do të përdorin këtë rrugë. Megjithatë, sipas propozimit, nuk do të vendosen tarifa për kalimin.
Çështja e sigurisë së lundrimit në Ngushticën e Hormuzit ka qenë në qendër të diskutimeve rajonale, për shkak të rëndësisë së kësaj rruge për furnizimin global me naftë dhe gaz.
Ministri i Jashtëm iranian, Abbas Araghchi, u takua të shtunën në Muskat me homologun e tij oman, Sayyid Badr Albusaidi, ku diskutuan mekanizmat për garantimin e kalimit të sigurt të anijeve në këtë korridor strategjik.
Ngushtica e Hormuzit lidh Gjirin Persik me Gjirin e Omanit dhe konsiderohet një nga pikat më të ndjeshme gjeopolitike në botë, pasi një pjesë e konsiderueshme e eksporteve globale të energjisë kalon përmes saj.
