Presidenti i Serbisë, Aleksandar Vuçiç, ka deklaruar se deklarata e ministres për Administratën Shtetërore dhe Vetëqeverisjen Lokale, Snezhana Paunoviç, nuk pasqyron vullnetin dhe politikën as të presidentit dhe as të Qeverisë së Serbisë.
Vuçiç theksoi se politika e udhëheqjes shtetërore të Serbisë bazohet në dialog, paqe dhe stabilitet, e jo në spastrim etnik.
“Ne duhet të jemi të përgjegjshëm. Politika jonë duhet të jetë dialogu, kompromiset dhe bisedimet dhe kurrë spastrimi etnik. Pikë. Tani, vetë Snezhana (Paunoviç) është viktimë e spastrimit etnik dhe kështu me radhë, por ky mesazh duhet të jetë krejtësisht i qartë: Politika jonë është plotësisht ndryshe. Pra, politika jonë është paqja, stabiliteti dhe jo spastrimi etnik”, tha Vuçiç në një deklaratë për mediat serbe në Kiev.
Ai komentoi gjithashtu vendimin e autoriteteve të Kosovës për ta shpallur Paunoviçin person non grata.
“Prishtina secilin prej nesh e ka shpallur persona non grata. Prishtina ia ndaloi hyrjen Ana Brnabiçit edhe për të marrë pjesë në pagëzimin privat të një fëmije në Manastirin e Graçanicës. Prandaj, ajo që thotë Prishtina nuk është relevante për askënd. A nuk ishte ai që fliste për përfshirjen time në ‘Sarajevo Safari’, i cili gjithmonë ka gënjyer brutalisht për serbët, ndërkohë që merret me spastrimin etnik të serbëve? Në fund, rezultati është se etnikisht janë spastruar më shumë se 250 mijë serbë, e jo shqiptarë”, tha Vuçiç.
Ai shtoi se deklarata e Paunoviçit ishte e pamatur dhe jo mjaftueshëm e përgjegjshme.
“Nuk duhet të dilet në publik me deklarata të tilla dhe kjo nuk është politika as e imja dhe as e Qeverisë së Serbisë. Është detyra jonë ta themi këtë qartë. Sa u përket të tjerëve që na japin leksione, më mirë të mos flasin fare. Kaq kam për t’ju thënë. Ne duhet të jemi të drejtë me veten. Unë vetë u kam kërkuar falje njerëzve për deklaratat e mia. Prandaj është mirë që gjërat të shqyrtohen me kujdes dhe të reagohet me kohë”, shtoi Vuçiç.
Të hënën, ministrja Paunoviç deklaroi se po të kishte qenë në vend të Slobodan Millosheviçit në vitin 1998, do ta kishte spastruar etnikisht Kosovën.
“Po të isha në vendin e Millosheviçit në vitin 1998, do ta kisha spastruar etnikisht Kosovën. Kjo është deklarata më e rëndë që kam bërë ndonjëherë. Jo në mënyrën se si ata duan të na likuidojnë neve, por në atë mënyrë që të mos ndiheshin pjesë e Serbisë dhe të shkonin në shtetin e tyre amë”, tha Paunoviç.
Paunoviç, e lindur në Pejë të Kosovës, prej kohësh njihet për qëndrimet e saj të ashpra lidhur me çështjen e Kosovës.
Pas kësaj deklarate për një media serbe, ajo u shpall persona non grata në Kosovë.
