Një gjykatë federale në Shtetet e Bashkuara ka rrëzuar politikën e administratës së Presidentit Donald Trump që pezullonte lëshimin e vizave imigruese për shtetasit e 75 vendeve, mes tyre edhe Shqipëria.
Vendimi u mor nga gjyqtarja federale Jeannette A. Vargas në Manhattan, e cila e cilësoi politikën si në kundërshtim me ligjin dhe përtej kompetencave që legjislacioni amerikan i jep Sekretarit të Shtetit.
Masa ishte vendosur nga Departamenti amerikan i Shtetit në janar dhe prekte shtetas nga 75 vende të botës. Ajo pezullonte lëshimin e vizave imigruese, pra vizave për personat që synojnë të vendosen përgjithmonë në Shtetet e Bashkuara. Kufizimi nuk përfshinte kategori të tilla si vizat turistike apo studentore.
Administrata amerikane e kishte argumentuar vendimin me pretendimin se shtetasit e vendeve të përfshira paraqisnin rrezik më të lartë për t’u kthyer në një “barrë publike”, duke përfituar nga burimet dhe programet e ndihmës shtetërore në SHBA.
Gjykatësja Vargas arriti në përfundimin se Sekretari i Shtetit, Marco Rubio, kishte tejkaluar kompetencat e tij duke vendosur një ndalim kategorik bazuar në kombësinë e aplikantëve. Sipas gjykatës, legjislacioni amerikan ua ngarkon zyrtarëve konsullorë shqyrtimin individual të kërkesave për viza.
Vendimi përbën një goditje të rëndësishme për një prej masave të administratës Trump për kufizimin e emigracionit të ligjshëm drejt Shteteve të Bashkuara.
Çështja ishte dërguar në gjykatë nga organizata që mbrojnë të drejtat e emigrantëve, së bashku me aplikantë të prekur nga masa dhe shtetas amerikanë që kishin sponsorizuar familjarët e tyre për viza imigruese.
