Të shtëna me armë zjarri janë dëgjuar mbrëmjen e sotme në zonën e njohur si “Hamalla e Dedës”, pranë fshatit Qafë T’Mugu, në Qelëz të Pukës.
Sipas informacioneve paraprake, një skuadër e Policisë ndodhej në një zonë të thellë malore, ku po monitoronte një parcelë të dyshuar të kultivuar me kanabis.
Dyshohet se efektivët janë pikasur nga persona që mund të jenë të përfshirë në kultivimin e lëndëve narkotike. Menjëherë pas kësaj janë dëgjuar të shtëna me armë zjarri, ndërsa ende nuk është konfirmuar zyrtarisht nëse ato janë drejtuar ndaj punonjësve të Policisë.
Për shkak të situatës, efektivët në terren kanë kërkuar përforcime. Drejt zonës janë nisur forca shtesë, ndërsa në operacion është angazhuar edhe një grup i FNSH-së nga Shkodra.
Deri më tani nuk raportohet zyrtarisht për persona të plagosur apo të arrestuar në lidhje me të shtënat.
Ngjarja merr rëndësi edhe për faktin se vetëm tre ditë më parë, në të njëjtën zonë, Policia arrestoi një person të dyshuar për kultivim të lëndëve narkotike dhe armëmbajtje pa leje.
Situata mbetet në zhvillim, ndërsa pritet që Policia të sqarojë rrethanat e ngjarjes dhe të identifikojë autorët e mundshëm të të shtënave.
