Ambasadori amerikan në Ankara dhe i dërguari i posaçëm i SHBA-së për Sirinë dhe Irakun, Tom Barrack, ka deklaruar se informacionet e inteligjencës që paraprinë sulmin izraelit ndaj një baze ushtarake ajrore në veri të Sirisë rezultuan të pasakta.
Barrack foli për sulmin ajror izraelit ndaj bazës së braktisur Abu al-Duhur, në provincën Idlib, duke thënë se Izraeli kishte marrë informacione se Turqia mund të ishte duke zhvendosur mjete ushtarake drejt kësaj baze dhe se këtë informacion ia kishte përcjellë Washingtonit.
Sipas tij, SHBA-ja i verifikoi këto të dhëna përmes agjencive të saj të inteligjencës, të cilat arritën në përfundimin se pretendimi nuk ishte i vërtetë.
“U konsultuam me agjencitë tona të inteligjencës dhe përgjigjja që morëm ishte se ky pretendim nuk ishte i vërtetë”, deklaroi Barrack.
Ai shtoi se mund të ketë pasur “një keqkomunikim” mes ushtrisë izraelite, Mossadit dhe Zyrës së Kryeministrit izraelit. Barrack theksoi gjithashtu se as SHBA-ja dhe as Turqia nuk ishin informuar paraprakisht për sulmin.
Diplomati amerikan e përshkroi ushtrinë turke si “të fortë dhe të guximshme”, duke theksuar se ajo është “shumë mirë e pajisur dhe e njeh mirë punën e saj”.
Nga ana tjetër, kryeministri izraelit Benjamin Netanyahu dhe Zyra e Kryeministrit kishin pretenduar se “ushtarët turq po përpiqeshin të vendoseshin në bazë dhe po dislokonin instalime ushtarake duke lëvizur drejt jugut”.
Avionët luftarakë izraelitë kryen tetë sulme ndaj bazës ajrore Abu al-Duhur, duke goditur pistën dhe një strukturë jashtë funksionit në një hangar, sipas një zyrtari sirian.
Deri tani nuk është bërë e ditur nëse sulmet kanë shkaktuar viktima apo të plagosur.
