Për më shumë se tre dekada, familjet e dy alpinistëve belgë nuk e dinin se ku kishin përfunduar njerëzit e tyre. Tani përgjigjja ka ardhur nga një akullnajë që po shkrihet.
Mbetjet e dy alpinistëve belgë, të cilët ishin 39 dhe 41 vjeç kur u zhdukën në vitin 1992, janë identifikuar në Alpet zvicerane.
Një alpinist gjeti mbetje njerëzore në fund të korrikut, pasi shkrirja e akullnajës Trift i kishte nxjerrë ato në sipërfaqe. Autoritetet organizuan më pas operacionin për rikuperimin e tyre.
Por identiteti mbeti për t’u zbuluar.
Analizat e ADN-së të kryera në një spital të kantonit Valais konfirmuan se bëhej fjalë për dy belgët që ishin zhdukur pranë malit Weissmies 34 vjet më parë.
Policia e Valais mban një bazë të dhënash me njerëzit që janë zhdukur në Alpe gjatë një periudhe që shtrihet mbi një shekull. Pikërisht kjo, së bashku me analizat gjenetike, po ndihmon në identifikimin e mbetjeve që dalin nga akulli.
Raste të tilla po bëhen më të shpeshta në Zvicër. Me tërheqjen e akullnajave, sipërfaqja po nxjerr sende dhe trupa njerëzish që janë ruajtur për dekada nën akull.
Për shkencëtarët kjo është një tjetër shenjë e shkrirjes së akullnajave. Për dy familjet belge është fundi i një pritjeje që nisi në vitin 1992.
