Londra thotë se zgjerimi i vendbanimeve të paligjshme po kërcënon paqen, sigurinë dhe perspektivat për krijimin e një shteti të qëndrueshëm palestinez.
Ministri i Jashtëm britanik, Ed Miliband, tha se Britania thirri të ngarkuarin me punë të Izraelit pasi qeveria izraelite shpalli një tender për një projekt të madh vendbanimesh në zonën E1 të Bregut Perëndimor të pushtuar, duke e cilësuar këtë veprim si “të papranueshëm dhe shkatërrues”.
“E1 kalon përmes zemrës së Palestinës dhe rrezikon të ndajë Bregun Perëndimor nga Jerusalemi Lindor i pushtuar, gjë që do të rrezikonte realizueshmërinë e një zgjidhjeje me dy shtete”, tha Miliband në një deklaratë.
“Britania ka qenë e qartë, si privatisht ashtu edhe publikisht, në kundërshtimin e saj ndaj E1 dhe në mbështetjen për një zgjidhje me dy shtete, si e vetmja mënyrë për të garantuar siguri dhe paqe afatgjatë si për palestinezët, ashtu edhe për izraelitët. Të gjitha vendbanimet e dëmtojnë këtë perspektivë dhe përbëjnë një shkelje flagrante të së drejtës ndërkombëtare”, shtoi ai.
Qeveria izraelite shkeli angazhimin e mëhershëm lidhur me projektin e diskutueshëm të vendbanimeve E1 në Jerusalemin Lindor të pushtuar, duke shpallur një tender për 1,234 njësi banimi në vendbanime, pa njoftuar personat që kishin kundërshtuar projektin në gjykatë dhe si pjesë e përpjekjeve të qeverisë për t´i dhënë fund çdo shansi shtetit palestinez.
Planet për të ndërtuar zonën e shënuar si E1 në lindje të Jeruzalemit janë dënuar ndërkombëtarisht me kohë, së bashku me ngulimet e paligjshme sipas ligjit ndërkombëtar. Projekti e ndan Bregun Perëndimor në dz pjesë dhe iyolon Jeruzalemin Lindor.
Miliband tha se e ngriti çështjen drejtpërdrejt me ministrin e Jashtëm izraelit, Gideon Sa’ar, dhe kërkoi që Izraeli të ndalonte menjëherë planet, të tërhiqte tenderin dhe të ndalonte zgjerimin e vendbanimeve të paligjshme.
“Përveç kësaj, i ngarkuari me punë i Izraelit është thirrur në Zyrën e Jashtme, të Komonuelthit dhe Zhvillimit, ku shprehëm kundërshtimin e thellë të Britanisë ndaj këtij veprimi të qeverisë së Netanyahut dhe kërkuam anulimin e menjëhershëm të tij”, theksoi ai.
Miliband paralajmëroi se zgjerimi i vendbanimeve të paligjshme dhe dhuna nga kolonët izraelitë po përkeqësojnë kushtet për palestinezët dhe po krijojnë ndarje që mund të bëhen të vështira për t’u zhbërë.
“Ndikimi i dhunës dhe terrorizmit të kolonëve ka qenë katastrofik për komunitetet palestineze. Zgjerimi i vendbanimeve dhe përpjekjet për të krijuar ndarje të pakthyeshme në terren kërcënojnë paqen, sigurinë dhe perspektivat për një shtet të qëndrueshëm palestinez”, tha ai, duke theksuar se Britania nuk do të qëndrojë mënjanë dhe të pranojë shkatërrimin e zgjidhjes me dy shtete.
