Gjyqtari Desmond Fagan i Gjykatës Supreme të Uellsit të Ri Jugor në Australi ka kritikuar ashpër përkufizimin e antisemitizmit të Aleancës Ndërkombëtare për Përkujtimin e Holokaustit (IHRA), të cilit i ishte referuar prokuroria në provat e saj, duke e përshkruar atë si “të stërzgjatur dhe të pasaktë” dhe, në fund, “të shkëputur nga realiteti”.
“Propozimi i IHRA-s është i shkëputur nga realiteti i përdorimit dhe kuptimit të zakonshëm të antisemitizmit në këtë vend”, shkroi Fagan, duke vënë në dukje se ai “nuk është i pari që ka kritikuar formulimin e paaftë të IHRA-s”.
Gjykatësi iu referua një sondazhi të Pew Research Center të qershorit 2026, i cili tregoi se 79% e australianëve e shihnin Izraelin në mënyrë të pafavorshme, me nivele të ngjashme mosmiratimi edhe në vende të tjera.
“Do të ishte absurde të sugjerohej se 79% e australianëve janë antisemitë sepse nuk e miratojnë trajtimin që Izraeli u bën palestinezëve”, tha Fagan. “Australianët që e kundërshtojnë fuqishëm trajtimin e palestinezëve nga Izraeli kanë lirinë të shprehin pikëpamjet e tyre.”
Deklaratat e tij u bënë në kuadër të një çështjeje ndaj një të riu nga Sidnei, kundër të cilit prokurorët përdorën si dëshmi grafitet antiIzrael duke i cilësuar si një rrezik të mundshëm terrorist. Fagan tha se çështja dukej se përbënte një “dështim serioz të drejtësisë”.
Fagan i kushtoi një pjesë të konsiderueshme të vendimit dallimit mes deklaratave antiIzrael dhe deklaratave antisemite. Ai hodhi poshtë argumentin se armiqësia ndaj Izraelit ose kundërshtimi ndaj sionizmit përbën automatikisht urrejtje ndaj hebrenjve, duke theksuar se sionizmi është një ideologji politike që mund të kritikohet.
“Për dekada me radhë, hebrenjtë kanë qenë ndër kritikët më të fuqishëm të sjelljes së Izraelit ndaj palestinezëve dhe kanë qenë burim i kërkesave të vazhdueshme për të drejtat e palestinezëve”, tha ai.
“Si mund të jetë antisemite – në kuptimin e përcaktuar të kësaj fjale – të denigrosh Izraelin, kur një veprim i tillë përputhet me fjalët dhe bindjet e shumë hebrenjve?”
Fagan vuri në dukje se shteti pretendonte gjithashtu se, për shkak se sloganet ishin shkruar me bojë në një zonë me një përqendrim të madh banorësh hebrenj dhe se ishte kryer dëmtim kriminal i pronës, shprehja “Fuck Israel” (Në djall Izraeli) kishte “në kontekst” kuptim antisemite.
“Unë nuk e pranoj këtë”, tha ai. “Natyra politike e mallkimit nuk u ndryshua nga rrethanat.”
Gjykatësi hodhi poshtë gjithashtu idenë se miratimi zyrtar i përkufizimit të IHRA-s mund të ndryshonte kuptimin e përcaktuar ligjërisht të antisemitizmit në Australi.
Përkufizimi është miratuar zyrtarisht nga qeveria australiane dhe është përkufizimi i pranuar nga komisioni mbretëror që po heton antisemitizmin, i krijuar pas sulmit terrorist në Bondi Beach në dhjetor, ku u vranë 15 persona gjatë një feste të Hanukës.
Ai paralajmëroi se shembujt e përfshirë në përkufizim lidhur me Izraelin mund të përfshijnë edhe kritika legjitime ndaj shtetit izraelit dhe tha se australianët hebrenj nuk duhet të trajtohen si një grup politikisht homogjen.
Vendimi vjen në një kohë kur qeveria federale australiane po nxit një miratim më të gjerë të kuadrit të IHRA-s, duke e bërë vendimin e Faganit një ndërhyrje të rëndësishme në debatin gjithnjë e më të tensionuar në Australi mbi antisemitizmin, Izraelin dhe lirinë e shprehjes politike.
