Deputetja e Partisë Demokratike, Ina Zhupa, i ka drejtuar një kërkesë zyrtare Kryetarit të Kuvendit, Niko Peleshi, për zhvillimin e një interpelance urgjente me Ministrin e Turizmit, Kulturës dhe Sporteve, Blendi Gonxhja.
Në kërkesën e protokolluar pranë Kuvendit, deputetja opozitare kërkon llogarimarrje mbi mbarëvajtjen dhe menaxhimin e sezonit turistik 2026, duke e akuzuar qeverinë se pas "propagandës për rekorde turistike" po fsheh një sërë problematikash serioze që dëmtojnë imazhin dhe ekonominë e vendit.
Sipas PD-së, ky sezon turistik po përballet me shqetësime të përsëritura në terren, ndër të cilat veçohen:
Ndotja dhe mbetjet: Mungesa e menaxhimit të mbetjeve urbane që ka krijuar ndotje masive në plazhe dhe qytete turistike.
Infrastruktura dhe furnizimi: Problemet e vazhdueshme me furnizimin me ujë të pijshëm, energji elektrike dhe mungesa e sinjalistikës rrugore.
Kaosi urbanistik: Ndërtimet pa standarde në vijën bregdetare dhe ndërhyrjet në zonat e mbrojtura.
Çmimet dhe siguria: Abuzimet me çmimet nga mungesa e kontrollit, privatizimi de facto i plazheve publike, si dhe mungesa e vrojtuesve të certifikuar të shpëtimit në plazhe.
Trashëgimia kulturore: Mungesa e investimeve reale për mbrojtjen dhe promovimin e pasurive kulturore.
Në shresën e saj, Zhupa thekson se turizmi është një sektor strategjik i ekonomisë që kërkon standarde, siguri dhe transparencë, e jo vetëm "fasadë propagandistike".
Deputetja kërkon nga ministri Gonxhja të japë shpjegime mbi masat konkrete të marra nga ministria, problematikat e evidentuara në terren dhe ndërhyrjet e kryera nga institucionet përgjegjëse.
