Kryeministri Edi Rama gjatë mbledhjes së sotme me deputetët e qarkut dhe drejtorët e bashkisë Tiranë, ka komentuar shembjet në Theth, duke u shprehur se premtimi në fushatë për legalizimet nuk ishte për ata që kishin ndërtuar pa leje.
“Premtimi ynë ka qenë do legalizojmë pronën e gjyshërve. Premtimi ynë nuk ka qenë, kurrë nuk e kemi bërë këtë, në asnjë nivel, askush nga përfaqësuesit tanë në asnjë cepë të Shqipërisë, na jepni votën ju dhe ndërtoni pa leje” – u shpreh Rama.
Natyrisht ndërtimi pa leje nuk mund të legalizohet dhe këtu kryeministri ka të drejtë. Por ajo që nuk shpjegon Rama është se pse administrata i la të ngriheshin këto ndërtime pa leje dhe u lanë të vazhdonin aktivitetin. Madje kur kishte këtë plan për t’i prishur këto objekte, pse nuk u tha banorëve të zonës kur i takonte në fushatë që të gjitha ndërtimet në shkelje të ligjit do të prishen.
Apo i la në liri shteti derisa të kalonin zgjedhjet për mandatin e katërt, dhe më pas u çoi fadromën si peshqesh.
