Në QSUT, përpara se një mjek të flasë në televizion, në një portal apo në një podkast, duhet të plotësojë formularin “Kërkesë për dalje në media”. Sipas dokumentit, procedura vlen edhe për infermierët e punonjësit e tjerë të spitalit, përfshirë deklaratat publike në rrjetet sociale.
Formulari kërkon të shënohen media, formati i daljes, tema, qëllimi i deklaratës, pjesëmarrësit e tjerë dhe materialet që do të përdoren. Më pas, kërkesa shqyrtohet nga Shefi i Marrëdhënieve me Publikun dhe i përcillet Drejtorisë së QSUT-së për miratim. Me pak fjalë, para se të hapet mikrofoni, duhet të kalojë shkresa.
Procedura ngre një pyetje: çfarë ndodh kur një punonjës kërkon të flasë publikisht për mungesë medikamentesh, kushte pune apo probleme në shërbimin ndaj pacientëve? Kritikët druhen se miratimi paraprak mund t’i frenojë këto deklarata. Për momentin, nga informacioni i dhënë nuk është e qartë nëse QSUT-ja bën dallim mes një daljeje në emër të institucionit dhe një deklarate të punonjësit në emrin e vet.
