Godina e një institucioni financiar privat në Rrugën e Durrësit, e sulmuar dhe e plaçkitur një ditë më parë, është përfshirë nga flakët pasditen e kësaj të mërkure. Zjarri rrezikon të përhapet edhe në ndërtesat përreth, mes tyre në Ambasadën e Vatikanit, pallate banimi dhe biznese që ndodhen pranë objektit.
Ngjarja vjen në një ditë të dytë të tensionuar në Tiranë, ku protesta e studentëve është shoqëruar me akte dhune dhe përplasje me policinë. Më herët, protestuesit sulmuan me molotov godinën e Ministrisë së Arsimit, duke shkaktuar vatra zjarri në katin e parë dhe të dytë. Gjatë incidentit, nga turma u dëgjuan thirrje “Digje! Digje!”, ndërsa drejt godinës u hodhën lëndë plasëse.
Pas disa minutash, forcat e policisë ndërhynë për të larguar protestuesit nga zona, ndërsa u angazhuan edhe në përpjekjet për shuarjen e zjarrit në ministri.
Tensionet u përhapën edhe në një degë banke të nivelit të dytë, pranë Rrugës së Durrësit, ku protestuesit thyen derën kryesore dhe nxorën dokumente nga raftet. Ndërkohë, zjarri që ka përfshirë godinën e institucionit financiar privat përbën rrezik edhe për objektet e tjera në afërsi.
Protestës iu bashkuan edhe studentë nga Universiteti i Mjekësisë, Fakulteti i Shkencave të Natyrës dhe nxënës të shkollave të mesme.
Përplasjet e kësaj të mërkure vijnë një ditë pas incidenteve ku disa persona mbetën të lënduar. Policia e Tiranës njoftoi se për ngjarjet e së martës kishte arrestuar 16 persona dhe kishte proceduar penalisht 49 të tjerë.
Ndërsa protesta vijon për të dytën ditë radhazi, situata në zonën e Rrugës së Durrësit mbetet e tensionuar.
