Ndërsa opinioni publik po valon prej tri ditësh nga lajmet për arrestimin e drejtoreshës së SHISH-it, Vlora Hyseni, dhe ndërsa zërat për mbledhjen e Këshillit të Sigurisë Kombëtare po bëhen gjithnjë e më të larta, Presidenti Bajram Begaj ka vendosur më në fund të fshijë sytë e të shfaqë shenja jete.
Në një njoftim për mediat që përmban më shumë hapësira boshe se sa përmbajtje, Presidenca njoftoi sot se Kreu i Shtetit ka pritur në takim Ministrin e Brendshëm Ervin Demo, Drejtorin e Policisë Skënder Hita dhe Drejtorin e komanduar të SHISH-it, Elvis Lila.
Sipas zyrës së shtypit, Presidenti "u informua dhe diskutoi me ta mbi çështje të aktualitetit".
Një "lëvizje strategjike" kjo e Begajt, i cili, në vend që të ushtrojë të drejtën e tij kushtetuese për të thirrur me urgjencë Këshillin e Sigurisë Kombëtare pas një goditjeje pa precedent në piramidën e inteligjencës, mjaftohet me një kafe rutinë me titullarët. Pas tre ditësh heshtjeje me faturë shtetërore, Presidenti u kujtua se në vend ka ndodhur diçka dhe se "aktualiteti" meriton të paktën një fotografi zyrtare.
Roli i fjetur i Presidencës vijon të mbetet i paprekshëm: asnjë qëndrim, asnjë vendimmarrje, thjesht një njoftim dy-rreshtash për të konfirmuar se orari i punës në Presidencë vazhdon rregullisht.
