Në një kohë kur protestat vijojnë të shoqërohen me tensione dhe përplasje mes demonstruesve dhe forcave të rendit, Policia e Shtetit ka dalë me një deklaratë publike, duke u kujtuar qytetarëve se e drejta për të protestuar në mënyrë paqësore garantohet me ligj.
Në reagimin e saj, Policia pretendon se gjatë protestës së sotme efektivët janë përballur me akte të vazhdueshme dhune, të cilat, sipas saj, kanë rrezikuar jetën dhe shëndetin e punonjësve të policisë, si dhe sigurinë e qytetarëve.
Institucioni u bën thirrje protestuesve të distancohen nga personat e maskuar dhe të dhunshëm, të cilët, sipas deklaratës, sulmojnë efektivët, institucionet dhe dëmtojnë pronën publike e private.
Policia kërkon gjithashtu që qytetarët të shmangin zonat ku po ndodhin përplasje, ndërsa paralajmëron se çdo veprim i dhunshëm do të trajtohet në përputhje me ligjin.
“E drejta për të protestuar në mënyrë paqësore është e garantuar me ligj. Dhuna, sulmet ndaj punonjësve të Policisë dhe dëmtimi i pronës publike e private janë të papranueshme dhe ndëshkohen me ligj”, thuhet në deklaratë.
Por ndërsa Policia kujton detyrimet ligjore të protestuesve, mbetet po aq i rëndësishëm detyrimi i saj për të respektuar të drejtën e tubimit, për të dalluar protestuesit paqësorë nga personat që kryejnë akte dhune dhe për të përdorur forcën vetëm kur është e nevojshme dhe në mënyrë proporcionale.
Në deklaratën e sotme nuk jepen sqarime për përdorimin e gazit lotsjellës apo të plumbave të gomës gjatë ndërhyrjeve policore.
Policia e Shtetit e mbyll reagimin duke deklaruar se vijon të jetë në krye të detyrës, në zbatim të ligjit dhe në shërbim të qytetarëve.
