Gjykata e Tiranës ka vendosur lirimin nga qelia të Franko Dopit, i cili u arrestua gjatë protestave të zhvilluara ditët e fundit në kryeqytet. Ndaj tij është caktuar masa e sigurisë “Detyrim për t’u paraqitur në policinë gjyqësore”.
Dopi po hetohet për veprën penale “Goditjet për shkak të detyrës”, ndërsa arrestimi i tij ishte kryer në flagrancë.
Gjatë seancës, Prokuroria kërkoi që arrestimi të vlerësohej i ligjshëm dhe ndaj protestuesit të vendosej masa e detyrimit për paraqitje.
Pas shqyrtimit të provave dhe dëgjimit të palëve, gjykata pranoi kërkesën e organit të akuzës, duke e cilësuar të ligjshëm arrestimin, por pa e konsideruar të nevojshëm vazhdimin e qëndrimit në qeli.
Me vendimin e marrë këtë të shtunë, më 24 tetor, gjykata urdhëroi lirimin e menjëhershëm të Dopit, nëse ndaj tij nuk ekziston ndonjë masë tjetër sigurimi apo vendim dënimi.
Pavarësisht lirimit, hetimet ndaj tij do të vijojnë, ndërsa ai duhet të respektojë detyrimin për t'u paraqitur pranë policisë gjyqësore.
