Gjithçka nisi me një copë letër të ngjitur në tabelën e njoftimeve të një shkolle në Dublin: “Baterist kërkon muzikantë për të krijuar një grup.”
Ishte viti 1976. Bateristi quhej Larry Mullen Jr. dhe shkolla ishte Mount Temple Comprehensive School. Pesëdhjetë vjet më vonë, U2 janë kthyer pikërisht aty ku filloi historia e tyre.
Bono, The Edge, Adam Clayton dhe Larry Mullen Jr. u shfaqën në oborrin e shkollës përpara rreth 900 nxënësve, për të festuar 50-vjetorin e lindjes së grupit dhe për të hapur simbolikisht një kapitull të ri, pak javë përpara publikimit të albumit të tyre të ri, “Carnaval de Luz”, i parashikuar për 13 nëntor.
Dhe për një grup që ka mbushur stadiumet më të mëdha të botës, skena këtë herë ishte qëllimisht e thjeshtë: pa megaskena, pa ekrane gjigante dhe pa spektakël elektronik. Vetëm kitarë, bas, bateri dhe zë.
“Ne ende ndihemi një school band”, u tha Bono nxënësve.
Koncerti nisi aty ku duhej të niste një kthim pas në kohë: me “I Will Follow”, këngën e albumit të tyre të parë Boy të vitit 1980. Më pas erdhën “Vertigo”, “Beautiful Day”, “Out of Control” dhe “Silencio”, kënga që paralajmëron albumin e ri.
Por një nga momentet më të veçanta erdhi kur 32 nxënës të shkollës, pjesë e orkestrës së re “Here”, morën violinat, violat dhe violonçelët dhe shoqëruan U2 në “One”.
“Ky ishull është plot muzikë dhe jam jashtëzakonisht krenar që jam irlandez”, u tha Bono nxënësve.
Historia kishte nisur pikërisht në këtë shkollë. Pas njoftimit të Larry Mullen, djemtë u mblodhën për herë të parë në shtëpinë e tij në 60 Rosemount Avenue, vetëm pak larg Mount Temple. Pesë dekada më vonë, ajo shtëpi është kthyer në një vend pelegrinazhi për fansat.
Gjatë ditës, grupi vizitoi edhe vende të tjera të historisë së tij në Dublin, ndërsa në mbrëmje erdhi një tjetër surprizë: U2 dolën përsëri për të luajtur në rrugët e qytetit.
Edhe koncerti në shkollë pati një fund që nuk ishte planifikuar. Kur dukej se gjithçka kishte përfunduar, britmat e nxënësve i kthyen katër muzikantët përsëri në skenë.
Encore: “With or Without You”.
Pesëdhjetë vjet më parë, një adoleshent kërkonte disa shokë për të krijuar një grup. Të premten, katër prej tyre u kthyen në të njëjtën shkollë për t’u treguar 900 adoleshentëve se çfarë mund të ndodhë kur dikush i përgjigjet një njoftimi të ngjitur në mur.
