Ka të paktën 24 orë që në media është shpërndarë një tekst i shkruar në format A4 dhe që po reklamohet nga PD si ankesë urgjente për mos përfshirjen në rezultatin përfundimtar të Zgjedhjeve të votave nga Diaspora.
Pasi u vumë në dijeni të asaj që u shpall si "ankesë urgjente", u interesuam dhe gjetëm të publikuar edhe kopjen e asaj që PD e quan "ankesë urgjente".
Ajo që lexojmë në fakt nuk ka asnjë lidhje me një dokument që mund të klasifikohet si "ankesë" për rezultatin e zgjedhjeve.
Letra e PD, firmosur me respekt nga Franci Nuri, nuk është ankesë.
Së pari, letra nuk referon asnjë dispozitë të Kodit Zgjedhor mbi bazën e të cilës të mund të mbështetej për t'u quajtur ankesë. Pa folur për formatin me të cilin duhet depozituar një ankesë në KQZ!
Nga ana tjetër duke mos u mbështetur në asnjë prej dispozitave të Kodit Zgjedhor, shkresa e PD, nuk mund t'i referohet për trajtim asnjërit prej organeve të Komisionit Qendror te Zgjedhjeve.
Shkresa i dërgohet Zotit Ilirjan Celibashi në cilësinë e titullarit të institucionit. Por nuk mundet t'i referohet atij në cilësinë e tij si organ i shqyrtimit të një kërkesë ose ankimimi administrativ. Sa kohë që shkresa nuk referon në ndonjë kompetencë të Komisionerit, kjo shkresë nuk mund të shqyrtohet nga Komisioneri në ndonjë nga mbledhjet që ai organizon me vetveten.Për këto arsye, shkresa nuk mund t'i përcillet për shqyrtim administrativ, asnjërit prej organeve të KQZ, as Komisionerit, as KAS-it e as Komitetit Rregullator.
Komisioneri Shtetëror i Zgjedhjeve mund t'i kthejë përgjigje Partisë Demokratike, por sa kohë që shkresa nuk referon në ndonjë dispozitë të Kodit Zgjedhore që mbështet pretendimin e PD, përgjigjen Komisioneri mund ta bëjë vetëm me shkresë të zakonshme. Sigurisht është e rekomandueshme që në fund të tregojë të njëjtin respekt për Zotin Nuri.
Shkresës së PD të pompuar si "ankesë", sot doli që t'i jepte zë edhe Berisha. Rastësisht konferenca për shtyp e Berishës koinçidoi me një nga operacionet më të mëdha të SPAK, në koordinim me prokuroritë e Italisë, Belgjikës dhe disa shteteve të tjera.
E gjjtha tingëllon si shumë zhurmë për një shkresë pa asnjë bazë ligjore.
