Kreu i Partisë së Lirisë, Ilir Meta, kërkon të bëhet një analizë e rezultatit të zgjedhjeve të 11 majit. Meta mesa duket ka dyshime ndaj numëruesve të Partisë Demokratike në Qarkun e Tiranës.
Në një postim në facebook, ai thotë se firmosi urdhrin për të analizuar çdo njësi dhe qendër votimi për të verifikuar punën dhe rolin e gjithësecilit.
Në zgjedhjet e 11 majit, Meta kandidoi në listën e hapur të koalicionit opozitar, PD-ASHM, ku nuk arriti dot të siguronte mandatin e deputetit.
“Të dashur anëtarë dhe simpatizantë të Partisë së Lirisë, Firmosa sot urdhrin për analizimin e rezultatit të zgjedhjeve të 11 Majit për çdo Njësi dhe Qendër Votimi në Qarkun Tiranë për të verifikuar punën dhe rolin e gjithsecilit.
Edhe njëherë faleminderit me mirënjohje të gjithë atyre të cilët i rezistuan presioneve të jashtëzakonshme të Narkoshtetit dhe nuk e shitën as lirinë, as shpirtin dhe as karakterin e tyre përballë një makinerie kriminale shtetërore, që cënoi rëndë standardet e zgjedhjeve, demokracinë dhe shtetin e së drejtës, duke vijuar me vendosmëri, qëndresë e kurajë t’i prijnë betejës tonë të përbashkët në mbrojtje të kauzave madhore”, shprehet Meta.
Ndërsa Partia Demokratike i ka dërguar një kërkesë urgjente Komisionit Qendror të Zgjedhjeve për mos certifikim të rezultatit të votave të diasporës dhe auditim të procesit të votimit nga jashtë.
Në kërkesën e firmosur nga përfaqësuesi i PD pranë KQZ, Franci Nuri, kërkon nga KQZ:
- Të mos certifikojë rezultatin për asnjë qark zgjedhor, përfshirë dhe rezultatin e votimit nga diaspora për atë qark, derisa të përfundojë një auditim i plotë dhe i pavarur mbi të gjithë procesin.
- Të ndërmarrë menjëherë një auditim të thelluar të gjithë procesit të votimit të diasporës, duke përfshirë:
Planifikimin dhe përgatitjen paraprake të procesit,
Prodhimin dhe shpërndarjen e fletëve të votimit;
Dërgimin, marrjen dhe protokollimin e zarfeve;
Procesin e administrimit, hapjes dhe numërimit të tyre;
“Zarfat që kanë mbërritur bosh, pa fletë votimi, si dhe raste të zarfeve të shpërndara nga individë të lidhur me struktura patronazhi;
Mospërputhje të rënda në numrin e zarfeve të ardhura dhe fletëve të numëruara; Raste si ai i zarfeve të dërguar për në qarkun Durrës që përmbanin fletë votimi për qarkun Gjirokastër,
Mungesë totale transparence mbi numrin e fletëve të votimit të prodhuara dhe vulosura për diasporën;
Rrjedhje të të dhënave të zgjedhësve, shpërndarje jozyrtare e zarfeve dhe anomali të theksuara në administrimin dhe numërimin e fletëve të ardhura nga jashtë vendit”, thuhet ndër të tjera në kërkesën e PD-së.
