Me tone mirënjohjeje dhe premtimi për vazhdimësi, Ilir Alimehmeti ka reaguar pas përfundimit të zgjedhjeve, duke falënderuar 18.125 qytetarët që i besuan vizionit të tij për një politikë më të ndershme, më njerëzore dhe më pranë qytetarit.
Në një mesazh të hapur, ai i është drejtuar qytetarëve, miqve dhe bashkëluftëtarëve të tij, duke theksuar se kjo nuk ishte një fushatë e zakonshme, por një thirrje për ndërgjegje dhe për t’u bashkuar rreth vlerave themelore të shoqërisë: ndershmërisë, punës dhe dinjitetit.
“18.125 herë ju i thatë ‘po’ shpresës, ndryshimit dhe të vërtetës. Ju jam thellësisht mirënjohës”, shkruan Alimehmeti, duke shtuar se çdo votë nuk ishte vetëm për një emër, por për një mënyrë të re të të bërit politikë.
Ai falënderon qytetarët që qëndruan pranë tij, që e mbështetën jo vetëm me votë, por me fjalë, buzëqeshje dhe besim. Për Alimehmetin, rezultati i zgjedhjeve nuk është fundi, por pikënisja e një rrugëtimi të gjatë dhe të ndershëm.
“Kjo është vetëm fillimi. Rrugëtimi do të vazhdojë me të njëjtin përkushtim, pa u ndalur”, shprehet ai në fund të mesazhit, duke lënë të kuptohet se angazhimi i tij në politikë do të vazhdojë, përtej çdo rezultati elektoral.
Me 18.125 vota preferenciale, Ilir Alimehmeti doli më i votuari i Partisë Demokratike në Tiranë nga vota e Diasporës, duke dëshmuar një mbështetje të fuqishme nga qytetarët për një figurë që përfaqëson ndershmërinë dhe politikën e bazuar në vlera. Megjithatë, për shkak të sistemit zgjedhor dhe renditjes në listë, ai nuk arriti të sigurojë një mandat në Kuvend.
