Kreu i Lëvizjes për Zhvillim Kombëtar (LZHK), Dashamir Shehi, ka dhënë sot dorëheqjen nga drejtimi i partisë, pas rezultatit zhgënjyes në zgjedhjet parlamentare të 11 majit. Në një konferencë për mediat, Shehi pranoi humbjen dhe mori përsipër përgjegjësinë për dështimin e koalicionit opozitar “Djathas për Zhvillim”.
“Duhet të pranojmë që Rama arriti këtë rezultat edhe për fakt të gabimeve të opozitës, edhe tonin brenda kësaj. Përgjegjësia bie kryesisht mbi lidershipin e partive opozitare. Kjo është një përgjegjësi që e mbaj unë personalisht. Për këtë motiv largohem nga drejtimi i koalicionit për t’i hapur rrugë njerëzve më të rinj dhe ndoshta më energjikë,” u shpreh Shehi.
Koalicioni “Djathas për Zhvillim”, pjesë e të cilit ishte edhe LZHK, arriti të marrë vetëm 5,530 vota në rang kombëtar, duke mos siguruar asnjë mandat deputeti.
Pas dorëheqjes së Shehit, ka reaguar edhe Enkelejd Alibeaj, një nga figurat kryesore të koalicionit. Ai tha se rezultati ishte poshtë pritshmërive dhe theksoi se duhet të ketë reflektim të thellë brenda opozitës.
“Rezultati që doli nga kutitë ishte poshtë pritshmërive tona. Ashtu si zoti Shehi, secili ka përgjegjësi, unë bashkë me të. Duhet të vendosim gishtin në plagë. Paaftësia jonë për të përcjellë tezat, programin dhe qëndrimet tona, është arsyeja kryesore. Dështuam për të ngjallur besim dhe entuziazëm te publiku,” u shpreh Alibeaj.
Ai shtoi se pavarësisht problemeve zgjedhore të evidentuara nga raporti i OSBE/ODIHR, fajin duhet ta kërkojnë fillimisht tek vetja.
