Për herë të parë, Këshilli Bashkiak në Shkodër u përball me bojkot dhe kundërshtim nga socialdemokratët gjatë mbledhjes së tij të radhës. Pas miratimit të 5 pikave të para të rendit të ditës, të cilat kishin të bënin me ndihmën ekonomike për qytetarët, qiranë e banesave sociale dhe strehimin emergjent për disa familje të dëmtuara nga zjarri, këshilltarët e PSD dhe PD vendosën të bojkotojnë mbledhjen.
Ata e arsyetuan këtë veprim duke thënë se miratimi i pikave të tjera është i paligjshëm për shkak të periudhës së fushatës elektorale.
Edhe nga ana e demokratëve, u shprehën se miratimi i këtyre vendimeve në këtë periudhë është kundërligjor. "Ne nuk mund të shohim veten si patericë. Nuk mund të bëhemi pjesë e këtij procesi", tha Marina Duhani, këshilltare e PSD-së.
Me largimin e socialdemokratëve dhe më pas të demokratëve, mbledhja u shpall e dështuar. Socialistët e cilësuan sjelljen e kolegëve të tyre të papranueshme. Një nga pikat kryesore që ishte dërguar për miratim ishte ajo për menaxhimin e plazheve publike nga Bashkia Shkodër, përfshirë edhe plazhin e Velipojës.
