Afati i vendosur nga kryeministri Edi Rama për dorëheqjen e drejtuesve të njësive bashkiake ka nisur të zbatohet. Sot gjashtë drejtues të njësive administrative në bashkinë e Korçës kanë paraqitur dorëheqjet e tyre pranë kryetarit të bashkisë.
Në mëngjes edhe disa drejtorë të bashkisë së Elbasanit, së bashku me administratorë të njësive vendore në këtë qark, janë larguar nga detyra.
Ndryshe nga dy bashkitë e para ka vepruar bashkia e Kukësit. Kjo e fundit ka shkarkuar nga puna dy nënkryetarët e bashkisë dhe të gjithë drejtuesit e njësive administrative. "Më datë 10 Korrik 2025, u zhvillua analiza e punës për performancën e institucionit të Bashkisë Kukës për periudhën Janar–Qershor 2025. Në funksion të përmirësimit të punës dhe rritjes së nivelit të shërbimit ndaj qytetarëve, Kryetari i Bashkisë Kukës vendosi të shkarkojë nga detyra 14 administratorë të Njësive Administrative dhe 2 nënkryetarë të Bashkisë. Puna do të vijojë me fokus në përmirësimin e treguesve të performancës në të gjithë sektorët ku janë evidentuar problematika, si dhe me vëmendje të shtuar ndaj cilësisë së shërbimeve për qytetarët”, thuhet në njoftimin zyrtar të bashkisë.Këto zhvillime pasojnë ultimatumin e kryeministrit Edi Rama, i cili, gjatë një takimi me kryebashkiakët në Durrës tre ditë më parë, kërkoi që deri sot të shkarkohen të gjithë kryetarët e Njësive Administrative në mbarë territorin e Republikës së Shqipërisë.
