Është rinisur më në fund sfida mes Francës dhe Irakut në Kampionatin Botëror, pas një ndërprerjeje të pazakontë prej rreth 1 ore e 50 minutash për shkak të kushteve të rënda atmosferike në Filadelfia.
Takimi u pezullua gjatë pushimit mes pjesëve për shkak të alarmit për stuhi dhe rrufe në zonë, duke detyruar organizatorët të zbatojnë protokollet e sigurisë për lojtarët, stafet dhe tifozët. Gjatë gjithë kohës, zyrtarët e ndeshjes qëndruan në kontakt me autoritetet meteorologjike për të vlerësuar situatën.
Edhe pse në një moment u diskutua mundësia e shtyrjes përfundimtare të ndeshjes, organizatorët vendosën të prisnin përmirësimin e kushteve të motit. Pasi rreziku kaloi dhe u garantua siguria, pjesa e dytë nisi zyrtarisht rreth orës 02:00 me orën lokale shqiptare.
Para ndërprerjes, Franca kishte marrë avantazhin 1-0 falë një supergoli të Kylian Mbappe. Sulmuesi francez shënoi në ndeshjen e tij të 100-të me fanellën e kombëtares, duke u bërë protagonist absolut i pjesës së parë.
Tashmë mbetet për t’u parë nëse pjesa e dytë do të sjellë emocione të tjera në një sfidë që do të mbahet mend jo vetëm për futbollin e luajtur, por edhe për ndërprerjen e gjatë të shkaktuar nga moti ekstrem.
