Sulmuesi polak Robert Lewandowski pritet ta vazhdojë karrierën në Shtetet e Bashkuara të Amerikës, pasi ka arritur marrëveshje me klubin e MLS-së, Chicago Fire.
Sipas raportimit të Diario Sport, 37-vjeçari ka vendosur të transferohet te skuadra amerikane pas largimit nga Barcelona në fund të sezonit të kaluar. Mësohet se javën e kaluar ai zhvilloi takime me drejtuesit e Chicago Fire për t’u njohur me projektin sportiv dhe planet afatgjata të klubit.
Pas shqyrtimit të opsioneve të ndryshme në merkato, Lewandowski ka dhënë miratimin për transferimin në MLS, duke refuzuar njëkohësisht oferta më të majme financiarisht nga klubet e Arabisë Saudite.
Burimet bëjnë të ditur se sulmuesi polak ka rënë dakord për një kontratë dyvjeçare, me mundësi rinovimi edhe për një sezon shtesë.
Përveç angazhimit si lojtar, Chicago Fire i ka ofruar Lewandowskit edhe një rol ambasadori të klubit pas përfundimit të karrierës së tij në futboll.
Sa i përket aspektit financiar, veterani polak pritet të përfitojë rreth 10 milionë euro neto në sezon, duke u bërë një nga emrat më të paguar në kampionatin amerikan.
Transferimi i Lewandowskit konsiderohet një nga goditjet më të mëdha të MLS-së në vitet e fundit dhe pritet të rrisë më tej interesin për futbollin në Shtetet e Bashkuara.
