Presidenti i Hungarisë, Tamas Sulyok, ka nënshkruar ndryshimin e 16-të të Kushtetutës, i cili vendos kufizim prej tetë vitesh për mandatin e kryeministrit dhe i pamundëson ish-kryeministrit Viktor Orban rikthimin në krye të qeverisë.
Sipas amendamentit të ri kushtetues, askush nuk mund të ushtrojë detyrën e kryeministrit për më shumë se tetë vjet në total, ose dy mandate. Rregulli zbatohet edhe për mandatet e mbajtura që nga viti 1990, çka e përjashton automatikisht Orbanin nga çdo kandidim i ardhshëm për këtë post.
Ndryshimi u miratua në Parlamentin hungarez me 135 vota pro, 50 kundër dhe 6 abstenime, pas fitores zgjedhore të forcës politike të kryeministrit aktual, Peter Magyar, e cila kishte premtuar reforma të thella institucionale.
Orban ka drejtuar Hungarinë në dy periudha të ndryshme, fillimisht nga viti 1998 deri në 2002 dhe më pas nga viti 2010 deri në humbjen e pushtetit pas zgjedhjeve të fundit.
Mbështetësit e reformës argumentojnë se kufizimi i mandateve forcon demokracinë dhe parandalon përqendrimin e pushtetit në duart e një individi, ndërsa kritikët e konsiderojnë masën si një ndërhyrje në të drejtën e qytetarëve për të zgjedhur liderët e tyre.
Vendimi konsiderohet një nga ndryshimet më të rëndësishme politike në Hungari në vitet e fundit dhe shënon fundin e mundësisë për një rikthim të Orbanit në postin e kryeministrit.
