Presidenti amerikan Donald Trump ka shkaktuar reagime të forta politike dhe mediatike pas deklaratave të tij ndaj kryeministres italiane Giorgia Meloni, të bëra gjatë një interviste telefonike për emisionin italian “L’Aria che tira” në televizionin La7.
Duke komentuar zhvillimet ndërkombëtare pas samitit të G7-ës në Evian, Trump u ndal edhe te raportet me kryeministren italiane ndërsa tha: “Më është lutur të bëjmë një foto bashkë. E donte aq shumë një foto me mua. Mund të mos e bëja fare, por më erdhi keq për të”, deklaroi presidenti amerikan.
Deklaratat e kreut të Shtëpisë së Bardhë sollën menjëherë reagimin e Giorgia Melonit, e cila i cilësoi fjalët e Trump si “totalisht të sajuara” dhe “të papranueshme” në raport me një aleat strategjik si Italia.
Në një video të publikuar në Instagram, Meloni u shpreh se ishte “sinqerisht e tronditur” nga qëndrimi i presidentit amerikan, duke shtuar se nuk është hera e parë që Trump përdor tone të tilla ndaj partnerëve perëndimorë.
“Është për të ardhur keq që nuk tregon të njëjtën vendosmëri ndaj armiqve të Perëndimit dhe të Shteteve të Bashkuara. Por një gjë duhet ta mbajë mend: unë dhe Italia nuk i lutemi askujt”, deklaroi kryeministrja italiane.
Sipas raportimeve të mediave italiane, biseda mes dy liderëve ishte e para pas tensioneve diplomatike të javëve të fundit. Trump deklaroi gjithashtu se nuk kishte qenë i detyruar të zhvillonte bisedën me Melonin.
Në vijim të intervistës, presidenti amerikan kritikoi ashpër Bashkimin Europian për politikat mbi emigracionin dhe menaxhimin e furnizimit energjetik, duke theksuar se Europa po përballet me pasoja të rënda për shkak të vendimeve të saj strategjike.
