Tregjet ndërkombëtare kanë reaguar menjëherë pas nënshkrimit të një marrëveshjeje kornizë mes Shteteve të Bashkuara dhe Iranit, e cila synon uljen e tensioneve dhe përfundimin e konfliktit në Lindjen e Mesme.
Zhvillimi është pritur pozitivisht nga investitorët, duke sjellë rënie të çmimeve të naftës dhe rritje të ndjeshme në bursat kryesore botërore. Në tregtimin e hershëm të së enjtes, nafta Brent ra me 1.12%, duke zbritur në 78.66 dollarë për fuçi, ndërsa nafta amerikane WTI humbi 1.28% dhe u tregtua me 75.81 dollarë për fuçi. Analistët e lidhin këtë rënie me uljen e rrezikut gjeopolitik në rajon dhe pritshmëritë për rikthimin gradual të eksporteve iraniane në tregjet ndërkombëtare.
Optimizmi u reflektua edhe në tregjet financiare aziatike. Indeksi japonez Nikkei 225 u rrit me rreth 5%, duke arritur nivele rekord, ndërsa Kospi i Koresë së Jugut fitoi 5.2%. Rritje shënuan edhe indekse të tjera, mes pritshmërive për stabilizim të furnizimit global me energji dhe zinxhirëve të tregtisë.
Sipas marrëveshjes, një nga pikat kyçe është rihapja e Ngushticës së Hormuzit, një prej korridoreve më strategjike për transportin e naftës në botë. Kryeministri i Pakistanit, Shehbaz Sharif, deklaroi se ngushtica do të hapet pa vonesë, ndërsa SHBA do të nisë heqjen graduale të bllokadave ndaj porteve iraniane.
Presidenti amerikan Donald Trump konfirmoi se marrëveshja është nënshkruar gjatë një darke zyrtare në Pallatin e Versajës, pas samitit të G7, duke deklaruar: “U nënshkrua. Sapo e firmosa në Versajë”.
Edhe Irani konfirmoi finalizimin e dokumentit. Zëdhënësi i Ministrisë së Jashtme iraniane, Esmail Baghai, bëri të ditur se memorandumi është nënshkruar nga palët dhe pritet të nisë faza e zbatimit.
Marrëveshja përfshin 14 pika, mes të cilave angazhimi që Irani të mos pajiset me armë bërthamore, krijimi i një fondi prej 300 miliardë dollarësh për rindërtim dhe zhvillim ekonomik, si dhe një periudhë 60-ditore negociatash për finalizimin e detajeve, lehtësimin e sanksioneve dhe normalizimin e lundrimit në Ngushticën e Hormuzit.
Megjithatë, disa çështje mbeten ende të hapura, përfshirë detajet teknike mbi programin bërthamor iranian, eksportet e naftës dhe administrimin e korridorit strategjik pas periudhës tranzitore.
Pavarësisht këtyre paqartësive, tregjet globale e kanë interpretuar marrëveshjen si një sinjal të fortë stabiliteti, duke ulur frikën për një krizë energjetike dhe përshkallëzim të mëtejshëm të tensioneve në Lindjen e Mesme.
