Kryeministri Edi Rama ka reaguar sërish ndaj protestuesve që kanë dalë në mbrojtje të natyrës, duke i akuzuar se nuk pranojnë të dëgjojnë faktet dhe zgjidhjet institucionale.
Në një postim të gjatë në rrjetet sociale, Rama u shpreh se qëllimi i protestuesve mund të jetë i mirë, por sipas tij mungon gatishmëria për dialog dhe bashkëpunim me institucionet dhe ekspertët.
“Problemi nuk janë flamingot. Qëllimi i tyre është i mirë. Problemi është se flamingot nuk pranojnë të dëgjojnë faktet, të diskutojnë zgjidhjet dhe të bashkërendojnë forcat me institucionet dhe me burimet serioze të ekspertizës”, shkruan Rama, duke shtuar se në këtë mënyrë ata “bëhen vegla e sorrave dhe korbave që i kanë rrethuar”.
Në reagimin e tij, kryeministri theksoi se simpatizon shqetësimin për mbrojtjen e natyrës, por kritikoi mënyrën e organizimit të protestës, të cilën e cilësoi si të shndërruar në një demonstrim politik “të varfër në argumente”.
Rama vijon më tej me një analizë më të gjerë mbi rolin e qëllimeve të mira në politikë dhe shoqëri, duke nënvizuar se ato, sipas tij, nuk mjaftojnë nëse nuk shoqërohen me racionalitet dhe pranimin e fakteve.
Ai shtoi gjithashtu se protestuesit nuk duhet të ndikohen nga “sorrat dhe korbat”, të cilët i përshkroi si përfaqësues të shpifjeve, teorive konspirative dhe bullizmit publik.
Rama në fund shprehet se mbështet shqetësimin për mjedisin, por kërkoi që debati të zhvillohet mbi baza faktike dhe institucionale, duke u ndarë nga ajo që ai e quajti “zhurmë politike dhe dezinformim”.
