Seanca plenare e së enjtes u shoqërua me tensione dhe përplasje politike, teksa kreu i PD-së, Sali Berisha, kërkoi që kryeministri Edi Rama të paraqitet në Kuvend për të dhënë dorëheqjen ose të përballet me një mocion votëbesimi.
Pas rrëzimit të kërkesës së opozitës për ndryshimin e rendit të ditës, deputetët demokratë u ngritën nga vendet e tyre dhe rrethuan Berishën në foltore. Situata u qetësua vetëm pasi kryetari i grupit parlamentar të PS-së, Niko Peleshi, pranoi t’i jepte edhe tre minuta kohë kreut të PD-së.
Në fjalën e tij, Berisha deklaroi se Kuvendi nuk mund të merret me çështje të tjera përveç asaj që ai e quajti “axhenda e protestës së qindra mijëra shqiptarëve”, duke pretenduar se kjo axhendë ishte mbështetur edhe nga Parlamenti Europian.
Por reagimi i mazhorancës erdhi nga ministri Taulant Balla, i cili ironizoi pretendimin se opozita përfaqëson protestuesit. Duke iu referuar edhe eurodeputetes Jorida Tabaku, Balla tha se askush nga protestuesit nuk e kishte mandatuar atë për të çuar kërkesat e tyre në Parlamentin Europian.
Kryetari i grupit parlamentar të PS-së sfidoi gjithashtu Sali Berishën, duke i kujtuar se, megjithëse flet çdo ditë në emër të protestës, ai vetë nuk ka marrë pjesë në tubimet qytetare dhe e ftoi që të shkojë në protestën e mbrëmjes.
Përplasja në Kuvend vjen në një moment kur protesta qytetare ka hyrë në javën e tretë dhe raporti i opozitës me lëvizjen në rrugë vazhdon të mbetet një nga temat më të debatueshme në politikën shqiptare.
