Kryetari i PD, Sali Berisha, ka lëshuar akuza të forta ndaj kryeministrit Edi Rama lidhur me ndërtimin e hotelit “Zig-Zag” në Vuno, duke ngritur dyshime mbi ligjshmërinë e pronës ku po zhvillohet investimi.
Në deklaratën për mediat, Berisha e cilësoi çështjen si një shembull të “shtetit të mafies”, ndërsa pretendoi se toka në fjalë ndodhet brenda kufijve që, sipas tij, pretendohen nga Edi Rama, familjarët e tij dhe fisi Koleka.
Sipas liderit të opozitës, investitori i regjistruar, Isa Aliu, nuk ka asnjë lidhje me zonën e Vunoit, ndërsa shtoi se mungojnë të dhënat mbi shitësit e pronës dhe mënyrën se si ajo është përfituar.
“Nuk kemi mundur të gjejmë shitësit. Nuk ekzistojnë. Është rasti i parë në histori kur ka blerës pa shitës. Ky këmbë njeriu të vetin në Vuno nuk ka. E kuptoni çfarë ndodh në shtetin e mafies?”, u shpreh Berisha.
Ai denoncoi gjithashtu manipulime të pretenduara në dokumentet e Kadastrës, duke deklaruar se një sipërfaqe e mbuluar me shkurre është regjistruar si “pemëtore”.
Gjatë deklaratës së tij, Berisha komentoi edhe vendimin e opozitës për të mos votuar amnistinë penale, duke argumentuar se mazhoranca kishte abuzuar me procesin në të kaluarën.
Sipas tij, amnistia është një e drejtë kushtetuese e Parlamentit, por nuk duhet të kthehet në një praktikë të përvitshme apo të përdoret për të favorizuar persona të dënuar për korrupsion.
“Rama e ka shndërruar amnistinë në një nismë të përvitshme, me të cilën shumëfishon kriminalitetin dhe godet rëndë drejtësinë”, deklaroi Berisha.
Kryedemokrati shtoi se opozita nuk pranoi amendamentet e propozuara nga mazhoranca, pasi sipas tij ato synonin ndërprerjen e proceseve gjyqësore dhe favorizimin e personave të dënuar për korrupsion.
Berisha komentoi edhe protestën e zhvilluar një ditë më parë, të cilën e cilësoi si të suksesshme, pavarësisht incidenteve që ndodhën gjatë saj.
“Ishte një provokacion i vogël, por demokratët nuk duhet të pengohen nga degëzat për të parë trungun madhështor të kësaj proteste”, tha ai.
Në përfundim, Berisha u bëri thirrje mbështetësve të Partisë Demokratike të marrin pjesë masivisht në protestat e opozitës dhe të qëndrojnë, sipas tij, “si opozitë e pamposhtur”.
