Kur ministri i Financave Petrit Malaj i tundte në Kuvend deputetit Agron Shehaj një dokument konfidencial të administratës tatimore, me synimin për të vënë në pikëpyetje transparencën e biznesit të tij, duket se kishte harruar të hidhte sytë nga bizneset e familjes së vet.
BDO Albania, kompania e lidhur me familjen e ministrit, rezulton prej vitesh në mospërputhje me detyrimet ligjore për transparencën. Raportet e transparencës, publikimi i të cilave është detyrim ligjor, janë ndërprerë në vitin 2022. Ndërkohë, deri më sot duhej të ishin publikuar edhe raportet pasuese, përfshirë ato të viteve 2023, 2024 dhe 2025.
Vetë Petrit Malaj ka qenë administrator i kompanisë, por nuk rezulton të ketë arritur të licencohet si auditues ligjor, ndryshe nga i ati dhe motra e tij, Besjana Doda. Që prej vitit 2024, ai mban detyrën e ministrit të Financave.
Në parim, vetë pozicioni i ministrit ngre çështjen e konfliktit të interesit me ushtrimin e profesionit të audituesit ligjor nga familjarët e tij. Besjana Doda vazhdon të ketë licencë aktive, por nuk rezulton të ketë deklaruar auditime të shoqërive publike që prej momentit kur vëllai i saj u emërua ministër i Financave. Mungesa e transparencës nuk lejon të kuptohet nëse ajo ka kryer auditime të subjekteve publike apo të shoqërive të lidhura me fondet publike.
Por aktiviteti i familjes jo vetëm që nuk është tkurrur, por përkundrazi është zgjeruar. Përveç BDO Albania dhe një kompanie tjetër të shërbimeve kontabël, në vitin 2025 është krijuar edhe një kompani për shërbime ligjore.
Ortakëria është krijuar me një kompani tjetër, e regjistruar në vitin 2023, e cila arriti të faturonte rreth 400 mijë euro vetëm gjatë vitit 2024. Në vitin 2025 ajo hyri në ortakëri me familjen e ministrit dhe tashmë rezulton me status pasiv. Shpejtësia me të cilën janë realizuar këto lëvizje dhe shumat e qarkulluara ngrejnë pikëpyetje që kërkojnë shpjegime.
Po ashtu vërehen edhe veprime juridike që transferojnë të drejtat mbi aksionet midis familjarëve. Në kushte normale, këto lëvizje do të duhej të shoqëroheshin me transparencë të plotë. Por me mungesën e organizuar të informacionit, si nga vetë familja ashtu edhe nga QKB, është e pamundur të nxirren përfundime.
Paradoksi është se ndërsa ministri i Financave kërkon transparencë nga të tjerët dhe përdor në debat publik dokumente konfidenciale të administratës që drejton, bizneset e lidhura me familjen e tij nuk kanë publikuar prej vitesh as dokumentet që ligji i detyron të bëjnë publike. Dhe kjo ndodh pikërisht në një periudhë kur aktivitetet e tyre janë zgjeruar dhe qindra mijëra euro të ardhura janë gjeneruar në kohë rekord.
Ndoshta përpara se të kontrollojë bizneset e të tjerëve, ministri i Financave duhet të nisë nga transparenca e biznesit të familjes së tij.
